ՌԴ-ում ԱՄՆ դեսպան Մայքլ Մաքֆոլը РИА Новости գործակալությանը տված հարցազրույցի ժամանակ ասել է, որ Վաշինգտոնը Եվրոպայում կկառուցի հակահրթիռային պաշտպանության այն համակարգը, որն անհրաժեշտ կլինի իրենց և իրենց դաշնակիցների պաշտպանության համար, և չի պատրաստվում ինչ-որ հարցում սահմանափակումներ մտցնել:
Պատասխանելով այն հարցին, թե ինչ է նշանակելու Ռուսաստանի համար Բարաք Օբամայի խոստումը, որ եթե երկրորդ անգամ ընտրվի նախագահ, ապա ՀՀՊ-ի հարցում ճկուն քաղաքականություն է վարելու, դեսպանը պատասխանել է. «Դա կնշանակի, որ մենք կկառուցենք ՀՀՊ այն համակարգը, որն անհրաժեշտ կլինի մեր և մեր դաշնակիցների պաշտպանության համար»:
«Մենք այս հարցում ոչ մի սահմանափակում չենք ուզում ունենալ, որովհետև մեր քաղաքացիների և մեր դաշնակիցների անվտանգությունն ամենակարևորն է մեզ համար»,- հավելել է դեսպանը:
Դեսպանի խոսքերով` Վաշինգտոնը հույս ունի իրականացնել ՀՀՊ համակարգն ամբողջ հզորությամբ՝ դրա հետ մեկտեղ չվտանգելով Ռուսաստանի հետ ռազմավարական հարաբերությունների կայունությունը։
«Դա մեծ խնդիր է: Այդ հարցը շատ ժամանակ է պահանջում: Կարծում եմ՝ նույնիսկ տարիներ»,- նշել է Մաքֆոլը:
