Հունվարի 19-ին Վահան Խալաֆյանի ծննդյան օրն է: Այսօր նա կդառնար 25 տարեկան:
Հիշեցնենք, որ Խալաֆյանը 2010 թվականի ապրիլի 13-ին բերման է ենթարկվել ոստիկանության Չարենցավանի բաժին գողություն կատարելու կասկածանքով, որտեղ մահացել է: Տղայի հարազատները համաձայն չեն ինքնասպանության վարկածի հետ ու պնդում են, որ Վահանը չէր կարող երկու անգամ դանակով հարվածել որովայնին, հետևաբար նրան սպանել են:
Գործը քննելուց հետո առաջին ատյանի դատարանը պաշտոնեական դիրքը չարաշահելու և Խալաֆյանին ինքնասպանության հասցնելու մեղադրանքով 8 տարվա ազատազրկման է դատապարտել Խալաֆյանի գործով հիմնական մեղադրյալ, Չարենցավանի ոստիկանության քրեական հետախուզության բաժնի նախկին պետ Աշոտ Հարությունյանին: Ամբաստանյալ Մորիս Հայրապետյանը դատապարտվել է 2 տարվա պայմանական ազատազրկման, իսկ բաժնի օպերլիազորներ Գագիկ Դավթյանն ու Գարիկ Ղազարյանն անմեղ են ճանաչվել։
Հիշեցնենք, որ Խալաֆյանի գործում մեղավոր ճանաչված Աշոտ Հարությունյանի ծնողները դեկտեմբերին դիմել էին ՀՀ նախագահին և գլխավոր դատախազին
«Հաղորդում հանցագործության մասին» հայտարարությամբ, որտեղ նշել են. «Ո’չ նախաքննական մարմինը, ո’չ դատարանը չցանկացան դուրս գալ ի սկզբանե նախասահմանված վարկածի շրջանակներից և մեր որդին` Աշոտ Հարությունյանը քավության նոխազ դարձվեց ու դատապարտվեց ուրիշի գործած մեղքի համար»: Հայտարարության մեջ Հարությունյանի ծնողները պնդում են նաև, որ Սամվել Տոնոյանը իրենց անկեղծորեն պատմել է, որ Վահան Խալաֆյանին Աշոտն անգամ մատով չի կպել, այդ ինքն է ծեծի ենթարկել Վահանին, իր իսկ բառերով «Տեղն ըլնի, ես եմ լխկել»:
Նշենք նաև, որ Խալաֆյանի իրավահաջորդները ևս համոզված են, որ ողբերգության իրական պատասխանատուն օպերատիվ գծով պետի տեղակալ Սամվել Տոնոյանն է:
Խալաֆյանները բողոքարկել են առաջին ատյանի դատարանի վճիռը և հույս ունեն, որ Վերաքննիչ դատարանում իրական մեղավորները կպատժվեն: