Այսօր լրագրողների հետ հանդիպման ժամանակ «Նախընտրական զարգացումները ՀՀ-ում» թեմայի շուրջ քննարկմանը մասնակցում էին «Ընտրությունը քոնն է» ՀԿ նախագահ Հարություն Համբարձումյանը և նույն ՀԿ մամլո խոսնակ Հասմիկ Սարգսյանը: Վերջինս ներկայացրեց հասարակական կազմակերպության կողմից իրականացված դիտորդության արդյունքները: Նա նաև հույս հայտնեց, որ ԿԸՀ-ի կողմից Սուքիասյանի և Մադաթյանի չգրանցումը քաղաքական ենթատեքստ չունի:
Անդրադառնալով ընտրազանգվածին ընտրակաշառքներ բաժանելու ավանդույթին` ՀԿ նախագահն ասաց, որ դա նորություն չէ, և այս ոչ դրական երևույթը միշտ է եղել և այժմ էլ շարունակվում է, որի պատճառը երկրի սոցիալ-տնտեսական վիճակն է։ Ըստ նրա` հատկապես այն համայնքներում, որտեղ մարդիկ ապրում են վատ պայմաններում, պատրաստ են իրենց ձայները վաճառել 5 հազար դրամի դիմաց:
«Հայտնի են ընտրակաշառքի դեպքեր նվերների և բարեգործությունների տեսքով, գումարային դեպքերի մասին առայժմ տեղյակ չենք, չնայած ընտանիքներ կատարած այցելություններից պարզվել է, որ փոշեկուլներ են առաջարկվել էժան գներով: Բարեգործություններ անում են ԲՀԿ-ն, ՀՀԿ-ն, ՕԵԿ-ը` կապված մարտի 8-ի հետ։ Այս պահին այս երեք կուսակցություններն են բարեգործություններ անում»,- մանրամասնեց ՀԿ նախագահը։
Հարություն Համբարձումյանը հավելեց, որ Ընտրական օրենսգրքի 18-րդ հոդվածի 1-ին կետով արգելվում է ընտրությունից մեկ օր առաջ և ընտրության օրը կաշառք բաժանել, իսկ մնացածը համարվում է քարոզարշավ: Նա նշեց, որ կուսակցությունները նմանատիպ գործունեությունը պարզաբանում են՝ ասելով, թե նախորդ տարիներին ևս եղել են նմանատիպ միջոցառումներ, սակայն բանախոսը դա համարում է ընտրակաշառք:
Նշենք, որ «Ընտրությունը քոնն է» ՀԿ-ն զեկույց է պատրաստում իրենց կազմակերպության երկարատև դիտորդության հիման վրա: Հ. Համբարձումյանի փոխանցմամբ` մարզերում և Երևանում ունեն 82 դիտորդներ, ովքեր տասն օր անց պետք է ներկայացնեն այն բոլոր փաստերը, որոնք արձանագրել են: Ուստի այդ ժամանակ հնարավոր կլինի ավելի ճշգրիտ ներկայացնել պատկերը:
