Սան Դիեգոյի շրջանային դատարանը երկուշաբթի մեքսիկացի նարկոբարոն Բենջամին Արելյանո Ֆելիքսին դատապարտել է 25 տարվա ազատազրկման և պարտավորեցրել վճարել 100 մլն դոլար տուգանք: Ինչպես հաղորոդում է Associated Press-ը, Արելյանո Ֆելիքսը գործարքի մեջ է մտել հետաքննության հետ՝ իրեն մեղավոր ճանաչելով դրամաշորթության և փողերի լվացման մեջ: 25 տարվա ազատազրկումն առավելագույն ժամկետն է, որին նա կարող էր դատապարտվել:
Շրջանային դատախազ Լարի Բերնսը, ելույթ ունենալով դատավճռից առաջ, ընդգծել է, որ Արելյանո Ֆելիքսն արժանի է ցմահ բանտարակության՝ հաշվի առնելով այն հսկայական վնասը, որ նա իր գործողություններով հասցրել է ինչպես ԱՄՆ-ին, այնպես էլ Մեքսիկային: Արելյանոյի հրամանով գործող մարդիկ ավելի երկարաժամկետ ազատազրկման են ենթարկվել:
Ինքը՝ 58-ամյա Բենջամին Արելյանո Ֆելիքսը, դատական նիստի ընթացքում հրաժարվել է քննարկել իր հանցագործությունները և ներողություն խնդրել կատարածի համար: «Ինձ մեղադրել են այնպիսի բաներում, որոնք արել են ուրիշները»,- ասել է նարկոբարոնը դատարանի դահլիճում:
Բենջամին Արելյանո Ֆելիքսը իր 6 եղբայրների հետ 1980-ականների վերջից գլխավորում է «Տիխուանա» նարկոկարտելը, որը հայտնի է նաև «Արելյանո Ֆելիքսի կազմակերպություն» անվամբ: Այն համարվում էր Մեքսիկայից ԱՄՆ թմրանյութեր փոխանցող ամենախոշոր մատակարարներից մեկը: 2002 թ. Արելյանոն ձերբակալվեց: Մեքսիկակակն բանտում նա անցկացրեց 10 տարի, իսկ 2011թ. ապրիլին տեղափոխվեց ԱՄՆ:
Արելիանոյի ձերբակալությունից և նույն՝ 2002 թ. ոստիկանության հետ փոխհրաձգության ժամանակ նրա եղբոր՝ Ռամոնի սպանությունից հետո «Տիխուանա» կարտելը սկսեց կորցնել իր ազդեցությունը, սակայն շարունակում է գոյություն ունենալ մինչ օրս: Արելյանո Ֆելիքսի ընտանիքի անդամները դարձել են հերոսները Սթիվեն Սոդերբերգի «Թրաֆիք» (2000 թ.) ֆիլմի, որը ստացել է 4 «Օսկար»։
