Այսօր ՀՀ արտգործնախարար Էդվարդ Նալբանդյանն ու Հայաստանում պաշտոնական այցով ՌԴ արտգործնախարար Սերգեյ Լավրովը համատեղ ասուլիսի ընթացքում անդրադարձան Իրանի միջուկային ծրագրի շուրջ ստեղծված լարվածության վերաբերյալ հարցին, մասնավորապես այն համատեքստում, թե ինչպես կազդի այս խնդրի շուրջ ծավալվող լարվածությունը Հայաստանի անվտանգության և ԼՂ հարցի կարգավորման վրա:
Ինչպես ասաց Նալբանդյանը, Հայաստանը բազմիցս նշել է, որ կողմ է, որ այս հարցի՝ միջազգային հանրության ներկայացուցիչների և Իրանի ղեկավարության միջև ընթացող բանակցությունների ճանապարհով լուծմանը. «Այդ դիրքորորշումն ասվել է վաղուց, և այն նույնն է նաև այժմ: Իրանը մեր հարևան երկիրն է, և մենք հետաքրքրված ենք, որ ուժի կիրառում չլինի, և խնդիրները լուծվեն բանակցությունների և երկխոսության միջոցով»:
Սերգեյ Լավրովն էլ հավելեց, որ եթե Իրանի հարցում տեղի ունենա «վատթարը», և ռազմական ուժ կիրառվի, ապա դա կազդի ոչ միայն Հայաստանի անվտանգության վրա, այլև Ադրբեջանի՝ հաշվի առնելով այն հանգամանքը, որ Իրանում երեք անգամ ավելի էթնիկ ադրբեջանցիներ կան, քան հենց նույն Ադրբեջանում. «Ռազմական ուժի կիրառման դեպքում փախստականների հոսք կառաջանա, դրանց մեծ մասը ՌԴ կգնան՝ հաշվի առնելով, որ Ռուսաստանում մեծ ադրբեջանական համայնք կա: Բացի այս, վտանգի տակ կդրվի նաև տարածաշրջանի, արաբական աշխարհի անվտանգությունը»:
Լավրովի խոսքերով՝ երբ հնչում են հայտարարություններ, թե հարցի լուծման բոլոր տարբերակները մնում են սեղանին, ապա այս հարցում պետք է հստակություն մտցնել, քանզի նման իրավիճակում կիրառվող միջոցները պետք է լինեն միայն օրինական և հիմնված միջազգային իրավունքի վրա. «Իսկ միջազգային իրավունքն արգելում է ուժ գործադրել, բացի այն դեպքերից, երբ քեզ վրա է ռազմական հարձակում տեղի ունեցել: Հուսով եմ, որ նրանք, ովքեր խոսում են բոլոր հնարավոր տարբերակների մասին, կհարգեն միջազգային իրավունքը»:
