Ռուսաստանը պատրաստվում է առաջիկայում Մոսկվայում ընդունել Սիրիայի երկու ընդդիմադիր խմբերի: Այս մասին, ինչպես հաղորդում է RIA Novosti-ն, այսօր տեղի ունեցած մամլո ասուլիսում հայտնել է Ռուսաստանի արտգործնախարար Սերգեյ Լավրովը:
«Մենք մշտական կապեր ունենք, և առաջիկայում նախատեսում ենք ընդունել ևս երկու պատվիրակություն, որոնք ներկայացնում են ընդդիմության երեք հատվածները»,- ասել է Լավրովը:
Նախարարը նշել է, որ խնդրի լուծման համար արհեստական ժամկետներ սահմանելն անընդունելի է:
«Վերջնագրերը և արհեստական ժամկետները հազվադեպ են օգնում գործին, իհարկե, մենք ցանկանում ենք անհապաղ դադարեցնել արյունահեղությունը: Բայց այդպիսի պահանջներ պետք է ներկայացնել բոլոր նրանց, ովքեր կռվում են Սիրիայում»,- նշել է Լավրովը:
Նրա խոսքերով՝ Սիրիայի կառավարությունը պետք է առաջին քայլն անի, պետք է սկսի զորքերի դուրսբերումը, բայց «եթե զորքերի այդպիսի հետաքաշումը մոտ ժամանակում չուղեկցվի Սիրիայի կառավարության դեմ պայքարողների կողմից նույնպիսի գործողություններով, ապա ես չեմ կարծում, որ մենք արդյունքների կհասնենք»:
Նախարարն ավելացրել է, որ «պահանջները պետք է ներկայացնել բոլոր նրանց, ովքեր զենքը ձեռքներին գտնվում են բարիկադների տարբեր կողմերում, անհրաժեշտ է ուժերն առանձնացնել, բարիկադները չեզոքացնել, ապահովել մարդասիրական օգնության մատակարարումը և սկսել քաղաքական գործընթացը»:
Սիրիայում ավելի քան մեկ տարի ընդդիմության և կառավարության միջև շարունակվող բախումներում ըստ ՄԱԿ-ի վերջին տեղեկությունների զոհվել է ավելի քան 9000 մարդ:
