Ռուսաստանի արտաքին գործերի նախարարությունը ակնկալում է Ուկրաինայի կողմից Ռուսաստանի օգտին լրտեսության մեջ մեղադրվող Արթուր Ստեփանյանցի դատավարության օբյեկտիվությունը: Այս մասին հաղորդում է Rosbalt գործակալությունը՝ վկայակոչելով Ռուսաստանի ԱԳՆ մամուլի և տեղեկատվության բաժնի հաղորդագրությունը:
«Ռոսաստանի ԱԳՆ-ն շարունակում է խորը անհանգստությամբ հետևել ռուսական «Էլեկտրական սարքերի գործարան» դաշնային պետական ունիտար ձեռնարկությունների ռուսական մասնաճյուղի… փոխտնօրեն Ռուսաստանի Դաշնության քաղաքացի Արթուր Ստեփանյանցի շուրջ ծավալվող իրադարձությանը, որը 2010թ. հունվարից պահվում է կալանքի տակ, և որի դեմ Ուկրաինայի իշխանություններն անհիմն կերպով փորձում են վերագրել գործողություններ, որոնք մեկնաբանվում են որպես «Ռուսաստանի օգտին լրտեսություն»»,- ասվում է հաղորդագրութան մեջ:
Հաղորդվում է, որ ռուսական կողմը բազմիցս ուկրաինական կողմի ուշադրությունն է հրավիրել այն հանգամանքի վրա, որ Ստեփանյանցին ներկայացված մեղադրանքներն անհիմն են: Մոսկվան ակնկալում է, որ մոտ օրերս կայանալիք Ստեփանյանցի դատավարությունը կլինի օբյեկտիվ, արդար և առանց քաղաքական ենթատեքստի:
Հիշեցնենք, որ 2010թ. հունվարի 29-ին Ուկրաինայի իշխանությունները հայտարարեցին, որ ձերբակալել են Ռուսաստանի քաղաքացի Արթուր Ստեփանյանցին և Սևաստոպոլի մի բնակչի, որոնք փորձել են գտնել և երկրից դուրս հանել թևավոր հրթիռների հսկողություն իրականացնող նավերի ռադիոտեղակայման կայանների բլոկներ:
Դատարանը պարզել էր, որ 2009թ. աշնանը լինելով Ուկրաինայի տարածքում՝ Ստեփանյանցը կապ է հաստատել Սևաստոպոլի մի բնակչի հետ, որը նախկինում ծառայություն էր անցել ՌԴ զինված ուժերում: Ստեփանյանցը նրան 4000 դոլար է խոստացել այդ գաղտնի բլոկները գողանալու և իրեն փոխանցելու համար:
Ստեփանյանցի դեմ քրեական գործ էր հարուցվել Ուկրաինայի Քր. օր.-ի 114-րդ հոդվածի առաջին մասով (լրտեսություն), իսկ Սևաստոպոլի բնակչի դեմ՝ «պետական դավաճանություն» հոդվածով:
2012թ. մարտի 22-ին «Մոսկովսկիե նովոստի» թերթը գրեց, որ մարտի 29-ին կսկսվեն Ստեփանյանի գործով կողմերի լսումները, որոնք կընթանան փակ ռեժիմով: Թերթի հաղորդմամբ՝ Սիմֆերոպոլում Ռուսաստանի գլխավոր հյուպատոսությունը մի քանի անգամ միջնորդություն է ներկայացրել՝ փոխել Ստեփանյանցի խափանման միջոցը, սակայն միջնորդությունները չեն բավարարվել:
«Այս գործը նորմալ չի ավարտվի: Հարկավոր է, որպեսզի իր դիրքորոշմամբ ակտիվ հանդես գա ռուսական կողմը,- ասել է Ստեփանյանցի կինը՝ Նելլին: – Ես մի քանի ամիս է՝ պայքարում եմ, որպեսզի Ռուսաստանի պաշտպանության նախարարությունը տեղեկանք տա առ այն, որ տվյալ սարքը Ռուսաստանի մտավոր սեփականությունն է, բայց առայժմ պատասխան չկա»:
