Այսօր Հայաստանի և Ռուսաստանի արտգործնախարարներ Էդվարդ Նալբանդյանն ու Սերգեյ Լավրովը հանդիպումից հետո հանդես եկան համատեղ մամուլի ասուլիսով:
Մինչ հարցերին անդրադառնալը՝ տեղի ունեցավ ՀՀ-ի և Ռուսաստանի միջև դիվանագիտական հարաբերությունների հաստատման 20-ամյակին նվիրված նամականիշի մարման արարողությունը, ինչից հետո ՀՀ և ՌԴ արտգործնախարարները ստորագրեցին համատեղ հայտարարություն:
Նալբանդյանն իր խոսքում նշեց, որ այս տարվա ընթացքում սա արդեն չորրորդ հանդիպումն է, բայց այս հանդիպումը խորհրդանշական բնույթ ունի, քանի որ կայանում է հայ-ռուսական դիվանագիտական հարաբերությունների 20-ամյակին նվիրված տոնակատարությունների շրջանակում:
Նալբանդյանի գնահատմամբ՝ այդ 20-ամյակը նշվում է շատ դրական մթնոլորտում` բարձր մակարդակի վրա գտնվող քաղաքական երկխոսության, նախագահների մակարդակով տեղի ունեցած 40-ից ավելի հանդիպումների ու տարբեր բնագավառների սերտ հարաբերությունների պայմաններում։
«Դրականը չափազանց շատ է, այս ցուցակը կարելի է երկար շարունակել: Մենք ուրախ ենք, որ այս 20-ամյակի ընթացքում ունենք հարաբերությունների նման մեծ պոտենցիալ»,- նշեց Հայաստանի արտգործնախարարը:
Սերգեյ Լավրովն էլ իր խոսքում նշեց, որ վաղը նշվում է հայ-ռուսական դիվանագիտական հարաբերությունների 20-ամյակը. «Վաղը նշվող հոբելյանը նշանավորում է մեր դիվանագիտական հարաբերությունները աշխարհաքաղաքական նոր դարաշրջանի պայմաններում»:
ՌԴ արտգործնախարարը նշեց, որ իրենք խրախուսում են երկու երկրների խորհրդարանական խմբերի միջև հարաբերությունները և նպատակ ունեն, որպեսզի նման հարաբերություններ լինեն նաև խորհրդարանների առանձին հանձնաժողովների միջև:
Սերգեյ Լավրովը նշեց, որ հանդիպման ժամանակ քննարկվել է նաև ԼՂ հիմնախնդիրը՝ շեշտելով, որ արդեն մի քանի տարի է՝ ՌԴ նախագահ Մեդվեդևը ակտիվ գործունեություն է ծավալում այս բնագավառում, որպեսզի կողմերի դիրքորոշումները մերձենան.
«Այդ աշխատանքը չի ավարտվել, և Ռուսաստանը պատրաստ է շարունակել իր գործունեությունը, իհարկե՝ կողմերի ցանկությամբ, որպեսզի կարգավորումը տեսանելի լինի»:
Հիշեցնենք, որ ապրիլի 2-3-ը պաշտոնական այցով Հայաստան է ժամանել ՌԴ արտգործնախարար Սերգեյ Լավրովը` Հայաստանի արտգործնախարարի հրավերով:
