Լրագրող Զոհրաբ Հարոյանը Ej էլեկտրոնային պարբերականի (ejournal.am) իր բլոգում գրում է.
Մի տեսակ այնպիսի տպավորություն է ստեղծվում, որ պարզունակության պիկին ենք հասել: Պրիմիտիվ են ժամանակակից երգերը, երաժշտությունը, հոդվածները, հեռուստահաղորդումները, գիտությունը, եթե իհարկե նման բան ունենք, ու ամեն ինչ: Ամեն ինչի մեջ բովանդակություն ու իդեա չկա: Անբովանդակ է նաեւ քաղաքականությունը: Քաղաքական իդեան եւս զրո է:
Մի քանի տարի առաջ, երբ Նինո Բուրջանաձեն ակտիվորեն Վրաստանում միտինգներ էր կազմակերպում, մի պատահականությամբ հայտնվել էի Թբիլիսիում ու Ռուսթավելիի անվան հրապարակում: Ընդդիմությունը փակել էր քաղաքի ողջ կենտրոնը: Վրաններ էր տեղադրել ու բոլոր վրանների վրա համարներ գրել իբրեւ պաշտպանություն իրենց երկրի քաղբանտարկյալների: Այդ ընթացքում վրացիները անհավանական ակցիաներ էին անում, որ ամեն անգամ կարելի էր զարմանալ: Ինչպես է այսպիսի բան անցել մտքներով: Մի օրինակ հիշեցի: Փողոցի անկյունում մեկը նստած թղթի վրա ինչ-որ բան էր գրում, կողքը մեկ ուրիշը արագ արտագրում էր նույն բանը, իսկ նրանից էլ մեկ ուրիշն էր արտագրում: Հարցրի` ինչ են անում, ընդդիմադիր վրացին ասաց, որ Սահակաշվիլին փակել է իրենց թերթը եւ հիմա իրենք հոդված են գրում ու այդ միջոցով տարածում: Հայաստանում, գոնե ես, անկախության 20 տարիների ընթացքում նման բան չեմ հիշում:
Հայաստանում մի տեսակ քաղաքական իդեան սկսվում ու ավարտվում է նախագահի թեկնածուի տան դիմաց թաղում կազմակերպելով ու դհոլ նվագելով: Միթե հնարավոր չէ նստել ու անգամ սեւ փի ար-ի համար լավ, հետաքրքիր մի բան մտածել: Իհարկե հնարավոր է, բայց հավանաբար հավես չունեն, կամ պրիմիտիվն էլ է լիովին բավարարում:
Քաղաքական պրիմիտիվիզմը ավելի է ընդգծվում նախընտրական գործընթացների ժամանակ: Օրինակ մարտի 8-ին Օրինաց Երկիր կուսակցությունը ոչ ավել, ոչ պակաս ամբողջ Հայաստանով մոշի ու դդմի մուրաբա բաժանեց, իբրեւ կանանց նվեր, բայց դե բոլորն էլ հասկանում են ինչու էր ՕԵԿ-ը քաղցրացնում քաղաքացիներին: Սա դեռ մի կողմ: Զարմանում եմ` ուղեղի ինչպիսի ծալքեր է պետք ունենալ, որպեսզի որպես ընտրակաշառք մուրաբա բաժանես: Տեսնես` ում մտքով է անցել, որ մի բանկա մուրաբայով մարդիկ ձայն կտան Օրինաց Երկրին:
Հետաքրքիրն այն է, որ Օրինաց Երկրի փոխնախագահը անգամ չհերքեց, չասաց նման բան չի եղել, չասաց, որ ձեռք եք առնում?, ինչ մուրաբա???: Ասաց, հա հենց էլ բաժանել են ու դրա մեջ ոչ մի վատ բան չկա:
Կա, տիկին Բիշարյան: Իրականում Պրիմիտիվիզմը սարսափելի վատ բան է:
