Ոչ պաշտոնական տեղեկությունների համաձայն` ընդդիմադիր «Ազգային դեմոկրատական լիգան», որը գլխավորում է Նոբելյան մրցանակակիր Աուն Սան Սու Ջին, հաղթում է խորհրդարանական լրացուցիչ ընտրություններում: Այս մասին հաղորդում է BBC-ն:
Այս ընտրություններում հաղթանակ տոնելու մասին հայտարարել են ընդդիմության ներկայացուցիչները, որոնք անցկացրել են սեփական հաշվարկը: Պաշտոնական տեղեկություններ առայժմ չեն հաղորդվում: Սակայն իշխանություններին մոտ գտնվող աղբյուրները հաստատում են այս տեղեկությունը:
Թեպետ հեղաշրջումից հետո ստեղծված խունտան շարունակում է վերահսկել խորհրդարանը, քանի որ հիմնական ընտրություններում իշխող կուսակցությունը բացարձակ մեծամասնություն էր ստացել, սակայն լրացուցիչ ընտրությունները փորձաքար են դարձել զինվորականների համար, որոնք հայտարարել են երկրում ժողովրդավարական բարեփոխումներ իրականացնելու մասին:
Հիշեցնենք, որ 1991թ.-ին կայացած ընտրությունների ժամանակ հաղթել էր ընդդիմությունը` ստանալով խորհրդարանի տեղերի մոտ 80%-ը: Սակայն իշխանություններն անտեսել էին այս ընտրությունների արդյունքները:
Ընդդիմության առաջնորդը երկար տարիներ եղել է տնային կալանքի տակ: 2011թ.-ին Մյանմայում պաշտոնապես վերացվել է ռազմական խունտան, որը երկրում իշխում էր վերջին 50 տարիներին` իշխանությունը փոխանցվել էր քաղաքացիական կառավարությանը:
