«Գերմանիան չի քննարկի Հունաստանի ռեպարացիաների հարցը՝ Երկրորդ համաշխարհային պատերազմում բալկանյան երկիրն օկուպացնելու համար»,– ասվում է Գերմանիայի ԱԳՆ հայտարարության մեջ: Այս մասին գրում է РИА Новости–ն:
Հունաստանի կառավարությունը կարծում է, որ Գերմանիան իրեն չի վճարել ռեպարացիան: Այս թեման Հունաստանում շատ է շոշափվում մայիսին կայանալիք արտահերթ խորհրդարանական ընտրություններից առաջ՝ նախընտրական քարոզարշավի շրջանակներում: Մի շարք հույն քաղաքական գործիչներ կարծում են, որ Գերմանիան Աթենքին պարտք է հարյուրավոր միլիարդ, գուցե նույնիսկ տրիլիոն եվրո: Գերմանիան ԵՄ–ի և Արժույթի միջազգային հիմնադրամի կողմից տրվող օգնության երկու փաթեթների հիմնական դոնորն է։ Նրա վճարումները 2010 թվականից ի վեր գերազանցել են 240 միլիարդ եվրոն:
«Գերմանիան Երկրորդ համաշխարհային պատերազմի համար պատասխանատվություն է կրում և խորը ցավում է մարդկանց պատճառած տառապանքների համար: Դա վերաբերում է նաև Հունաստանի օկուպացմանը»,- ասվում է Գերմանիայի ԱԳՆ հայտարարության մեջ:
Գերմանիան պատերազմի ավարտից հետո, 1946 թվականի համաձայնագրի շրջանակներում Հունաստանին ռեպարացիա է վճարել:
«Պատերազմի ավարտից 65 տարի անց ռեպարացիայի հարցը, Գերմանիայի կառավարության տեսանկյունից, այլևս չի քննարկվում»,- եզրափակել են Գերմանիայի ԱԳՆ-ում:
Գերմանիան Հունաստանին 1960-ական թվականներին վճարել է 115 միլիոն մարկ (67 միլիոն դոլար)՝ որպես 1941-1944 թվականներին օկուպացիայի ընթացքում կրած վնասի փոխհատուցում։ Այն ժամանակ հարյուր հազարավոր մարդիկ մահացել են սովից և գնդակահարվել են: Հունական կառավարությունը կարծում է, որ այդ փոխհատուցումը բավարար չէ:
