Սիրիայի ազգային խորհրդի ղեկավար Բուրհան Գալյունը, հանդես գալով Ստամբուլում ընթացող «Սիրիայի բարեկամներ» խմբի համաժողովում, միջազգային հասարակությանը կոչ է արել ճանաչել ՍԱԽ-ն` որպես սիրիացի ժողովրդի միակ օրինական ներկայացուցիչ:
Հիշեցնենք, որ մարտի 28-ին սիրիական ընդդիմությունը ՍԱԽ-ն ճանաչել էր Սիրիայի ժողովրդի պաշտոնական ներկայացուցիչ՝ իշխանությունների հետ բանակցելու համար: Նման որոշում կայացվել էր Ստամբուլի համաժողովի արդյունքներով:
Սիրիայի ազգային խորհուրդը սիրիական ընդդիմադիր կուսակցությունների և խմբավորումների խոշոր միավորում է: Խորհուրդը հանդես է գալիս Սիրիայի գործող նախագահ` Բաշար Ալ-Ասադի իշխանությունից հեռանալու և խորհրդարանական ընտրություններ անցկացնելու պահանջներով:
Ավելի վաղ ՍԱԽ-ի ղեկավար Գալյունը ասել էր, որ Անանի ծրագիրը լավն է, սակայն այն չի արտահայտում սիրիացի ժողովրդի իրական պահանջները:
Հիշեցնենք, որ երեկ սիրիական իշխանությունները հաստատել են ՄԱԿ-ի և ԱՊԼ-ի հատուկ ներկայացուցիչ Քոֆի Անանի ծրագիրը` ուղղված սիրիական ճգնաժամի կարգավորմանը: Նախագիծն իր մեջ ներառում է բռնությունների դադարեցում, երկխոսություն իշանութունների և ընդդիմադիր ուժերի միջև, սիրիացի ժողովրդին հումանիտար օգնության տրամադրում:
