Հայաստանի քաղաքականապես ակտիվ բնակչության 40 տոկոսը ոչ մի քաղաքական գործչի չի վստահում: Նման տվյալներ են ստացվել «Սոցիոմետր» սոցիոլոգիական հետազոտությունների կենտրոնի իրականացրած հարցումների արդյունքում: Ահարոն Ադիբեկյանի կենտրոնի իրականացրած հարցումներից պարզվում է, որ ՀՀ 1650 քաղաքացիների 17 տոկոսը վստահում է Սերժ Սարգսյանին, իսկ Լևոն Տեր-Պետրոսյանին վստահում է 4,5 տոկոսը: Ադիբեկյանի գնահատմամբ, հարցումները ցույց են տվել, որ թե՛ իշխանությունը և թե՛ ընդդիմությունը վստահության խնդիր ունեն: Նրա խոսքերով, Հայաստանի քաղաքացիները ընդդիմությանն ավելի շատ են վստահում, քան իշխանություններին, սակայն միևնույն ժամանակ ընդդիմության առաջնորդներին պակաս ազդեցիկ են համարում:
Ադիբեկյանը նաև փորձել է պարզել, թե 2010 թ. երկրում տիրող սոցիալ-տնտեսական իրավիճակի համար ում են պատասխանատու համարում ՀՀ քաղաքացիները: Հարցվածների 50.5 տոկոսը սոցիալ-տնտեսական վիճակը կապում են երկրի նախագահի հետ, 24-ը` վարչապետի, 7,5-ը` ԱԺ նախագահի և միայն 2 տոկոսը` ընդդիմադիր ուժերի: Ըստ Ադիբեկյանի՝ այս թվերը ցույց են տալիս, որ Հայաստանում ամեն ինչ կենտրոնացված է իշխանությունների ձեռքում, ինչը վայել չէ ժողովրդավարական երկրներին: