Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը չի հավատում, որ ընտրական գործընթացները վերահսկելու նպատակով ոստիկանությունում և գլխավոր դատախազությունում ստեղծված հատուկ աշխատանքային խմբերը հնարավոր ընտրախախտումների, ընտրակեղծիքների ու ընտրակաշառքների դեմ կարողանան արդյունավետ աշխատանք ծավալել: Այս մասին նա ասաց «Առաջին լրատվական»-ի հետ զրույցում:
«Հաշվի առնելով նախորդ ընտրությունների ժամանակ իրավապահ մարմինների դրսևորած վարքագիծը՝ չեմ կարծում այս անգամ վերոնշյալ մարմինները կարողանան լիարժեքորեն վերահսկել ընտրություններից առաջ և հենց ընտրությունների օրը հնարավոր խախտումները: Ես, որպես իրավապաշտպան, նրանցից ոչ թե հայտարարություններ, այլ կոնկրետ գործողություններ եմ ակնկալում, այն է՝ ընտրակաշառքների բաժանման, ինչպես նաև վարչական ռեսուրսի ապօրինի օգտագործման դեպքերի բացահայտում, դրանց մասին հանրությանը պարբերական ծանուցում՝ ամենշաբաթյա հրապարակային հաշվետվությունների ձևով: Նույն կերպ՝ ընտրությունների օրն իրենց կողմից կատարված աշխատանքների մասին հաշվետվություն՝ ընտրություններից ամենաուշը 3 օր անց»,- նշեց Արթուր Սաքունցը:
Հիշեցնենք, որ ՀՀ ոստիկանապետ Վլադիմիր Գասպարյանն օրերս անձնակազմին ցուցում էր տվել ԱԺ ընտրություններին նախորդող շրջանում և հատկապես ընտրությունների օրը խիստ ու հետևողական լինել ցանկացած իրավախախտի հանդեպ և օրենքով վերապահված լիազորությունների շրջանակում կանխել ընտրական գործընթացի խոչընդոտման յուրաքանչյուր փորձ:
Նա հույս էր հայտնել, որ կկանխարգելվեն ու կբացահայտվեն ազատ և արդար ընտրություններին խոչընդոտող հանցագործությունները, և ՀՀ ոստիկանությունն իր իրավասությունների շրջանակում արդյունավետ կիրականացնի ազատ, արդար և ժողովրդավարական ընտրությունների կայացման իր գործառույթը:
Հայաստանի գլխավոր դատախազ Աղվան Հովսեփյանի կարգադրությամբ էլ ստեղծվել է աշխատանքային խումբ` մայիսի 6-ին կայանալիք խորհրդարանական ընտրություններում տեղ գտած խախտումները ուսումնասիրելու նպատակով: Բացի այդ, ստեղծվել է հատուկ գրասենյակ բոլոր դիմումների և հաղորդագրությունների հաշվարկման համար:
