Կենտրոնական ընտրական հանձնաժողովն ընտրացուցակներում առկա քաղաքացիների թիվը հրապարակեց 2 միլիոն 485 հազար 844: Մարդահամարի նախնական տվյալներով` ներկայում ՀՀ բնակչության թիվը 2 միլիոն 870 հազար է: Ընտրության իրավունք ունեն 18 տարին լրացած ՀՀ քաղաքացիները: Այսինքն՝ ստացվում է, որ մեր երկրում մինչև 18 տարեկանները մոտ 385 հազար են:
1994-1998 թթ. ԿԲ նախագահ Բագրատ Ասատրյանն «Առաջին լրատվական»-ի հետ զրույցում սա որակեց որպես անխելքություն: Ըստ նրա`անցած տարի ՀՀ-ում ծնվել է 44 հազար մարդ, վերջին 18 տարիների ընթացքում միջին թիվը մոտ 790 հազար է ստացվում: «Արդեն թիվը չի համապատասխանում: Երկրում հաշվառման ոչ մի համակարգ չկա, Հայաստանում չգտնվողները հաշվառված են ընտրողների ցուցակում: Դա հող է նախապատրաստում խախտումներ, ընտրակեղծիքներ անելու համար»,- ասաց Բ. Ասատրյանը:
Նա հիշեցրեց, որ նախորդ ընտրություններին մասնակցածների ցուցակների հրապարակման պահանջը հենց այդ նպատակով էր դրվել, մինչդեռ իշխանությունները դիմադրեցին դրան. «Դա վկայում է, որ ակնհայտ գնալու են ընտրակեղծիքների: Եթե ընտրության համընդհանուր ցուցակները հրապարակեին՝ ընտրողների ստորագրություններով հանդերձ, այդ ժամանակ պարզ կլիներ`ով է բացակայում երկրից, ով է այստեղ»:
ԿԸՀ հրապարակած ընտրացուցակներում, Բ. Ասատրյանի խոսքով, ընդգրկված են այն մարդիկ, որ երբևիցե Հայաստանում ապրել են: Բ. Ասատրյանը համոզված է, որ այս պարագայում ընդդիմությունը պետք է շատ ավելի սուր վերաբերմունք դրսևորի, անգամ մինչև ընտրություններին մասնակցությունից հրաժարում: «Կեղծիքների համար 200-300 հազար ձայնի վտանգ կա, իսկ դա որոշիչ ազդեցություն կարող է ունենալ ընտրությունների արդյունքների վրա: Պետք է կտրուկ քայլեր ձեռնարկեն, ընդհուպ մինչև հրաժարվեն նման ֆարսի մասնակցելուց: Մեր երկիրը փրկելու միջոցը իրական, օբյեկտիվ ընտրություններն են»,- շեշտեց Բ. Ասատրյանը:
