ՆԱՏՕ-ն իսպանացի զինծառայողներին մեղադրել է նավաբեկության ենթարկվող մոտորանավակի աղետյալներին օգնության ձեռք չմեկնելու մեջ, ինչի հետևանքով 2011թ. մահացել էին ավելի քան 60 աֆրիկացի փախստականներ: Այս մասին գրում է բրիտանական The Guardian պարբերականը:
Մարտի 28-ին այն հրապարակել էր հատվածներ Եվրախորհրդի զեկույցից, որը վերաբերում էր այդ դեպքին: Փաստաթղթում նշվում է, որ փախստականները օգնության խնդրանքով դիմել էին իտալական առափնյա պահպանությանը ու ՆԱՏՕ-ին, սակայն վերջիններս չեն արձագանքել:
Ավելի վաղ ՆԱՏՕ-ում ժխտում էին, որ ստացել են ազդանշաններ Լամպեդուզա իտալական կղզիների մոտից: Սակայն այս շաբաթ առաջին անգամ Դաշինքի ղեկավարությունն ընդունեց, որ իրեն հաղորդել են վթարի մասին: ՆԱՏՕ-ի մամլո ծառայությունից հայտարարել են, որ ազդանշանը վերահասցեավորել են իսպանական «Մենդես Նունիս» ֆրեգատին, որը ավելի մոտ է գտնվել ներգաղթյալների նավին:
Մինչ այդ, սակայն, նշենք, որ Իսպանիայի պաշտպանության նախարարությունը պնդել է, որ չի ստացել աղետի մասին տեղեկացնող ազդանշան: «Եթե իրականում եղել է զգուշացում, ապա այդ մասին պետք է լինի ձայնագրություն: Եթե ՆԱՏՕ-ն հայտարարում է, որ եղել է այդ հաղորդագրությունը, ապա պետք է այն հաստատի»,- հայտարարել է իսպանական կողմը:
2011թ. մարտի 25-ին 72 աֆրիկացիներով մոտորանավակը Տրիպոլիից ուղևորվում էր Լամպեդուզա: Ճանապարհի կեսին վերջացել էր վառելիքը ու այն ավելի քան երկու շաբաթ նավարկել է Միջերկրական ծովում: Ապրիլի 10-ին քամիները այն քշել են Լիբիայի ափերը: Այդ ժամանակ 63 ուղևորները մահացել էին սովից ու ծարավից:
