Ուկրաինայի նախկին վարչապետ Յուլյա Տիմոշենկոն Newsweek-ին տված հարցազրույցի ժամանակ անդրադարձել է իրեն ներկայացված մեղադրանքներին: Հիշեցնենք, որ նրան մեղադրանք էին ներկայացրել` պետբյուջեից մոտ 500 մլն դոլար ոչ նպատակային ծախսելու համար: «ԽՍՀՄ-ում բանտերն ու ճամբարները պայքարի միջոց էին ազատ քաղաքական զարգացումների դեմ: Ուկրաինայում, դժբախտաբար, նախագահ Յանուկովիչը վերադարձրել է սովետական այդ ավանդույթը»,- ասել է Տիմոշենկոն: Իրեն ներկայացված մեղադրանքներին անդրադառնալով`էքս-վարչապետը հայտնել է, որ Յանուկովիչը, մանրակրկիտ հետաքննություն անցկացնելուց հետո, հայտնաբերել է միայն մեկ «հանցանք». Յանուկովիչի կարծիքով` Տիմոշենկոն թոշակները վճարել է տնտեսության զարգացման համար նախատեսված միջոցներից: Տիմոշենկոն ասել է, որ այդ հայտարարությունը չի համապատասխանում իրականությանը և հավելել. «Նրանք, ովքեր այժմ իշխանության ղեկին են, լավ են գլուխ հանում ստվերային տնտեսությունից, բայց, ավաղ, շատ քիչ են հասկանում պետֆինանսներից: Նրանք շփոթել են բյուջետային հաշիվները»:
Ճաղերի հետևում հայտնվելու հեռանկարի մասին հարցին Տիմոշենկոն պատասխանել է. «Ինձ ընդհանրապես չի հետաքրքրում`որտեղ կհայտնվի Յուլյա Տիմոշենկոն: Ինձ անհանգստացնում է, թե ինչ կկատարվի Ուկրաինայի հետ»:
Տիմոշենկոն հարցազրույցը եզրափակել է` ասելով. «Ես հրապարակավ պատասխանել եմ նրանց, հիմա էլ կրկնում եմ` ես իմ երկրից չեմ հեռանա»:
