«Ժողովուրդ»-ը գրում է, որ Աժ նախագահ Սամվել Նիկոյանի` Արաբական Միացյալ էմիրություններ այցը թեև տևել է 3 օր, սակայն այնտեղ նա ունեցել է ընդամենը 1 հանդիպում` ԱՄԷ դաշնային ազգային խորհրդի նախագահ Մուհամմադ Ահմադ ալ-Մուրրի հետ:
«Ուշագրավն այն է, որ առավելագույնը 1 ժամ տևողությամբ այս հանդիպման համար Նիկոյանն ԱՄԷ-ում մնացել է 3 օր, իսկ դա իր հերթին նշանակում է Աժ միջոցներից հսկայական գումարների ծախս, այն էլ մի ամբողջ պատվիրակության համար»:
Ի դեպ, «Ժողովուրդ»-ին իր դիվանագիտական աղբյուրներից հայտնի է դարձել, որ այդ հանդիպման համար պայմանավորվածությունը ձեռք է բերվել ընդամենը 1 օր առաջ, երբ Նիկոյանը դեռ Ալմաթիում էր: Ընդ որում, հանդիպումն էլ կազմակերպվել է Նիկոյանի` Դուբայ ուղևորությունն արդարացնելու համար:
«Պատահական չէ, որ Աժ պաշտոնական հաղորդագրության մեջ մի քանի անգամ շեշտված է, թե իբր հանդիպման մասին ձեռք է բերվել նախնական պայմանավորվածություն: Նման հանդիպումների համար պայմանավորվածությունները սովորաբար ձեռք են բերվում նախապես, ուստի տարօրինակ է, որ տեքստում շեշտվել է այդ մասին:
Ու հենց այդ հանգամանքն էլ ևս մեկ անգամ ապացուցում է այն իրողությունը, որ Նիկոյանը ցանկացել է Աժ նախագահի վերջին օրերն անցկացնել Դուբայում, սակայն այցին պաշտոնական «վերնագիր» է դրել»:
