Սմոլենսկի մոտ ավիավթարից զոհված Լեհաստանի նախկին նախագահ Լեխ Կաչինսկու դուստրը՝ Մարտան, պահանջում է շարունակել վթարի պատճառները պարզելու միջազգային հետաքննությունը: Նա կարծում է, որ և՛ ռուսական, և՛ լեհական կողմերը կատարվածի վերաբերյալ կեղծ տեղեկություն են ներկայացրել: Այս մասին գրում է Der Standard-ը:
«Աղետի պատճառների հետաքննության ժամանակ խախտումների ծավալը և՛ Ռուսաստանի, և՛ Լեհաստանի կողմից այնքան մեծ է, որ գործում միջազգային միջամտության անհրաժեշտությունը ավելի ակնհայտ է, քան անցյալ տարվա դեկտեմբերին»,- ասել է նա Եվրախորհրդարանի լսումներում ելույթ ունենալիս:
Եվրախորհրդարանի պատգամավորների առջև ելույթ են ունեցել փորձագետներ, որոնք նշել են, որ Միջազգային ավիացիոն կոմիտեի և աղետի հետաքննման լեհական կոմիտեի պաշտոնական զեկույցում անհամապատասխանություններ կան և պնդել են, որ անհրաժեշտ է ստուգել բոլոր փաստերը:
Այս տեսակետը կիսում է նաև զոհված նախկին նախագահի եղբայրը՝ «Օրենք և արդարություն կուսակցության» ղեկավար Յարոսլավ Կաչինսկին: Նա իր հայտարարության մեջ նշել է, որ աղետն ավելի շուտ հիշեցնում է ահաբեկչություն:
Հիշեցնենք, որ Լեհաստանի նախագահ Լեխ Կաչինսկու օդանավը վթարի է ենթարկվել 2010թ. ապրիլի 10-ին Սմոլենսկի մոտ: Օդանավում եղել է 96 մարդ՝ 88 ուղևոր և անձնակազմի 8 անդամ: Բոլորը զոհվել են, այդ թվում՝ նախագահը, նրա կինը և Լեհաստանի ղեկավարության մի մասը:
Աղետի հետաքննման արդյունքում ռուս և լեհ քննիչները եկել են այն եզրակացության, որ աղետի պատճառը եղել է օդաչուի սխալը և ինքնաթիռի անսարքությունը:
