2011թ. փետրվարի 6-ին ԼՂՀ պաշտպանության բանակի «Արայի լեռ» զորամասում սպանված 19-ամյա Գևորգ Կոծինյանի մահվան գործով ՀՀ վերաքննիչ քրեական դատարան ներկայացված ինչպես պաշտպանական կողմի, այնպես էլ Կոծինյանի իրավահաջորդի ներկայացուցիչների բողոքներն այսօր մերժվել են: Այս մասին «Առաջին լրատվական»-ին հայտնեց փաստաբան Էդմոն Մարուքյանը:
Չորս ծառայակիցների կողմից ծեծվելու հետևանքով մահացած զինծառայող Գևորգ Կոծինյանի իրավահաջորդի ներկայացուցիչներ, փաստաբան Էդմոն Մարուքյանը և փաստաբան Կարեն Թումանյանը վերաքննիչ բողոքով պահանջել են դատարանից ճանաչել Գևորգ Կոծինյանի կյանքի իրավունքի խախտման փաստը, քանի որ գտնում են, որ կատարված սպանության համար պատասխանատու է նաև պետությունը: «Մենք կարծում ենք, որ եթե պետության ներքո գործող կազմակերպության` ի դեմս պաշտպանության նախարարության, ենթակայության տակ գտնվող մարդ է մահացել, անկախ նրանից, թե հանցագործներն ովքեր են, պետությունն ինքը պատասխանատու է: Հետևապես դատարանում մենք բարձրացրել ենք հետևյալ երկու հարցերը. եթե վերաքննիչը գտնի, որ կոնկրետ հանցավոր ճանաչված անձինք են հանցագործություն կատարել` իրենցից պահանջելու ենք նյութական փոխհատուցում` 2 մլն դրամի չափով, իսկ պետությունից բարոյական վնասի փոխատուցում` 5 միլիոն դրամի չափով: Մենք գիտենք, որ մեր օրենսդրությունը բարոյական վնասի փոխհատուցում չի սահմանում, բայց այս հարցը մեզ համար ստրատեգիական է»,- «Առաջին լրատվական»-ի հետ զրույցում նշեց Գևորգ Կոծինյանի իրավահաջորդի ներկայացուցիչ Կարեն Թումանյանը:
Իսկ Էդմոն Մարուքյանի խոսքով` իրենք սպասում էին դատարանի այս որոշմանը, քանի որ Հայաստանում նման ինստիտուտ չի գործում, իսկ իրենք պատրաստվում են այս գործը հասցնել մինչը Մարդու իրավունքների եվրոպական դատարան:
Հիշեցնենք, որ 19-ամյա զինծառայողի մահվան պատճառը, ըստ դատաբժշկական փորձաքննության արդյունքների, սրտի ռեֆլեկտոր կանգն է, սակայն քննությունը պարզել է, որ Կոծինյանին ծեծի են ենթարկել 4 ծառայակիցները, ովքեր եղել են ալկոհոլի ազդեցության տակ: Այս գործով կրտսեր սերժանտ Մարգար Դավթյանը դատապարտվել է 11 տարի 6 ամիս ժամկետով ազատազրկման, շարքայիններ Տարոն Սուվարյանը և Վահե Աղաջանյանը՝ 11 տարի ազատազրկման, ավագ լեյտենանտ Արմեն Ռաֆայելյանը՝ 3 տարվա ազատազրկման: Արմեն Ռաֆայելյանի նկատմամբ կիրառվել է համաներում, և նա ազատվել է պատժի կիրառումից:
