ԲՀԿ նախընտրական ցուցակում տեղ զբաղեցնելու համար կուսակցության պատգամավոր Վարդան Բոստանջյանն իսկապես համապատասխան դիմում է գրել, ստորագրել, նույնիսկ գույքի և եկամուտների հայտարարագիր ստորագրել: Այս մասին նա ասաց «Առաջին լրատվական»-ի հետ զրույցում:
«Կուսակցության քաղխորհրդի բոլոր անդամները, այդ թվում՝ ես, որպեսզի պատրաստ լինենք, կանխավ դիմումներ ենք գրել, հայտարարագրեր ներկայացրել»,- ասաց պատգամավորը:
Հարցին՝ տեղյա՞կ է, որ ըստ մամուլի հավաստիացումների, ԲՀԿ համամասնական ցուցակից իր անունը ջնջել է անձամբ ՀՀ երկրորդ նախագահ Ռոբերտ Քոչարյանը, Վարդան Բոստանջյանը պատասխանեց. «Ո՛չ, ես չեմ կարծում, որ դա կարող է իրականության հետ կապ ունենալ, որովհետև Ռոբերտ Քոչարյանը եղել է մեր երկրի նախագահը. չեմ կարծում, որ Բոստանջյանն էն ձևի կարևոր մի դեմք է, որի նկատմամբ անպայման նման որոշում պետք է կայացվեր»:
Նշենք՝ «Հրապարակ»-ը գրում է, որ ԲՀԿ խմբակցության պատգամավոր Վարդան Բոստանջյանի անունը կուսակցության համամասնական ցուցակից ջնջել է անձամբ Ռոբերտ Քոչարյանը: Երբ կուսակցության նախագահ Գագիկ Ծառուկյանը համամասնական ցուցակի նախնական տարբերակը ներկայացրել է Ռոբերտ Քոչարյանի հաստատմանը, վերջինս ջնջել է Բոստանջյանի անունը:
Քոչարյանը Բոստանջյանին չի ներել փետրվարի սկզբին ասուլիսներից մեկում արված այն հայտարարության համար, ըստ որի ԲՀԿ-ն առիթ չունի չսատարելու նախագահին: «Մենք ունենք փաստաթուղթ, իսկ մենք միշտ հարազատ ենք մեր կողմից ստորագրված փաստաթղթին»,- ասել էր Բոստանջյանը` նկատի ունենալով մեկ տարի առաջ ստորագրված կոալիցիոն հուշագիրը»:
