ՀՀ կրթության և գիտության նախարար Արմեն Աշոտյանը հանդիպում է ունեցել երիտասարդ գիտնականների խորհրդի հետ: Պետությունը որպես հավելյալ աջակցություն 100 մլն դրամ էր հատկացրել երիտասարդ գիտնականներին վերջինների և ՀՀ նախագահի հետ հանդիպումից հետո:
Հանդիպման ընթացքում երիտասարդ գիտնականները Արմեն Աշոտյանի հետ քննարկել են խորհրդի աշխատակարգը, որի հարցում նրանք որոշակի անհամաձայնություններ ունեին: Աշխատակարգը ձևավորվել է գիտնականների առաջարկությամբ, աշխատակարգի համաձայն՝ գիտնականներն իրենք պետք է բաշխեն գոմարը:
«Ցավալի է, որ երիտասարդ գիտնականները, ովքեր հանրապետության նախագահի առջև ծրագիրն իրականացնելու պատասխանատվություն են ստանձնել և ստացել այդ վստահությունը, այս պահին ինքնակազմակերպման բավարար մակարդակ չեն կարողանում դրսևորել: Վստահ եմ, որ գումարը տեղ է հասնելու, թե ինչպես, և աշխատանքային որ խմբի կողմից՝ տեխնիկական խնդիր է»,- հանդիպման ժամանակ ասել է Արմեն Աշոտյանը:
Հանդիպման ընթացքում քննարկվել են երիտասարդ գիտնականների բոլոր վիճահարույց հարցերը: ԿԳՆ-ի տեղեկացմամբ՝ Արմեն Աշոտյանի և խորհրդակցության խմբի անդամների միջնորդությամբ կայացվել է աշխատակարգի վերաբերյալ վերջնական որոշում:
