LG-ի 55-դյույմանոց էկրանով OLED հեռուստացույցի գինը կկազմի 7.9 հազար դոլար,- հաղորդում է The Verge բլոգը՝ վկայակոչելով հարավկորեական Maeil գործարար թերթին:
Ըստ պարբերականի՝ LG-ն հեռուստացույցը պաշտոնապես կներկայացնի Կաննի միջազգային կինոփառատոնի շրջանակներում, որը կանցկացվի Ֆրանսիայում մայիսի 16-ից 27-ը: Սակայն ընկերության ներկայացուցիչներն այս տեղեկությունը դեռ չեն հաստատել:
LG-ն նախատեսել է, որ նոր հեռուստացույցը վաճառքի կհանվի մինչև Օլիմպիական խաղերի մեկնարկը, որի ժամանակ սովորաբար մեծանում է հեռուստացույցերի պահանջարկը:
Նոր OLED-հեռուստացույցի մասին LG-ն հայտարարել է CES 2012 ժամանակ՝ հունվարին: Նոր մոդելի էկրանն ամենամեծն է այս տեսակի հեռուստացույցների մեջ, այն շատ բարակ է՝ 4 միլիմետր, և քիչ քանակությամբ էներգիա է խլում:
Առաջին OLED-հեռուստացույցը՝ Sony XEL-1-ը, վաճառքի է հանվել 2008 թ.՝ 2.5 հազար դոլարով:
