ԱՄՆ-ի Գերագույն դատարանի դատավորների կարծիքը տարանջատվել է այն հարցի շուրջ, թե արդյոք արժե՞ հակասահմանադրական ճանաչել առողջապահության բնագավառում բարեփոխումների օրինագիծը, թե՞ արգելել նրա միայն մեկ կետը, որը պարտադրում է քաղաքացիներին գնել բժշկական ապահովագրություն:
Առողջապահության բնագավառի բարեփոխումը դարձել էր նախագահ Բարաք Օբամայի գլխավոր ներքաղաքական ուղղությունը: Սեպտեմբերի կեսերին ԱՄՆ-ի Անկախ բիզնեսի ազգային ֆեդերացիան և 26 նահանգների ղեկավարությունը կոլեկտիվ հայց էր ներկայացրել Գերագույն դատարան` խնդրելով վերանայել առողջապահության մասին օրենքը:
Դիմումի հեղինակների կարծիքով՝ Կոնգրեսը գերազանցել է իր լիազորությունները` պարտավորեցնելով ԱՄՆ-ի բոլոր քաղաքացիներին ձեռք բերել ապահովագրություն կամ էլ տուգանք վճարել: Եվ քանի որ այդ պահանջները հիմնականն են բարեփոխման մեջ, ապա հայցվորները խնդրում են արգելել օրենքն ամբողջությամբ:
Դատարանը պետք է որոշի դրա սահմանադրականությունը երեք օրվա ընթացքում: Առաջին լսումները եղել են երկուշաբթի օրը: Սակայն լսումների կարևոր օր է դարձել երեքշաբթին, երբ դատավորները քննարկել են այն հարցը, թե արդյո՞ք Կոնգրեսն անցել է իր լիազորությունների սահմանը:
Ինչպես հաղորդում է РИА Новости գործակալությունը, դատարանը որոշել է, որ Կոնգրեսը չի անցել իր լիազորությունների սահմանը, բայց դատավորները դեռ հարցեր են ունեցել ապահովագրության անպայման գնման վերաբերյալ:
Պահպանողական դատավորների կարծիքով այդ կետը պարտադրում է քաղաքացիներին ծառայությունը գնել, իսկ լիբերալ դատավորները չեն տեսնում ոչ մի խախտում այդ կետի մեջ:
Վճռական խոսքը պատկանում է Էնթոնի Քենեդի անունով դատավորին, որը ավելի վաղ հայտարարել էր, որ այս պարագայում իրեն ավելի մոտ է պահպանողականների դիրքորոշումը: Չորեքշաբթի օրը Քենեդին լսել է երկու կողմերի ներկայացուցիչների խոսքն էլ, բայց դեռ որոշում չի կայացրել, ինչը հույս է տալիս, որ նա կմիանա լիբերալներին:
ԱՄՆ-ում բարեփոխման հարցը վաղուց է հասունացել: Օբամայի նախաձեռնությունն ուղղված է բուժօգնությունը ավելի մատչելի և հասանելի դարձնելուն:
Ներկա դրությամբ ելույթները շարունակվում են: Չորեքշաբթի օրը դատարանը պետք է նախնական որոշում կայացնի օրենքի` Սահմանադրությանը համապատասխանելու մասին և այն հաստատի հունիսի սկզբին:
