Ազգային վիճակագրական ծառայության և ոստիկանության անձնագրային ու վիզաների վարչության կողմից հրապարակված ՀՀ բնակչության, ինչպես նաև ընտրողների ընդհանուր թվաքանակին վերաբերող տվյալների անհամապատասխանությունը նախանշան է, որ առաջիկա ընտրությունների մասնակիցների թիվը կեղծված է լինելու: «Առաջին լրատվական»-ի հետ զրույցում այս մասին ասաց ՀԱԿ անդամ Պետրոս Մակեյանը:
Հիշեցնենք, որ ըստ ոստիկանության անձնագրային և վիզաների վարչության պետ, ոստիկանության գնդապետ Հովհաննես Քոչարյանի՝ այս պահի դրությամբ Հայաստանի ընտրացուցակներում կա 2 միլիոն 485 հազար 844 ընտրող: Մինչդեռ փետրվարի սկզբին Ազգային վիճակագրական ծառայության հրապարակած մարդահամարի նախնական տվյալների համաձայն՝ Հայաստանում բնակչության թիվը ներկայումս 2 միլիոն 870 հազար է: ԱՎԾ-ի տվյալներով՝ 2001 թվականի մարդահամարի արդյունքի համեմատությամբ բնակչությունն այսօր պակասել է 415 հազարով:
«Նորմալ երկրներում, սովորաբար, ընտրողների թիվը կազմում է ընդհանուր բնակչության 60-65 տոկոսը: Մեր դեպքում դա մոտ 1.6 մլն մարդ է կազմում: Հայաստանի պարագայում ստացվում է, որ թեև մարդիկ երկրից արտագաղթում են, սակայն ընտրազանգվածը մեծանում է: Պատահական չէ, որ կոալիցիոն կուսակցությունների ներկայացուցիչները դռնեդուռ ընկած անձնագրային տվյալներ են հավաքում»,- ասաց Պետրոս Մակեյանը՝ հավելելով, որ իշխանությունները ընտրացուցակները չեն հրապարակում մտածված կերպով:
