BBC-ն հրապարակել է ՄԱԿ-ի և Արաբական պետությունների լիգայի հատուկ բանագնաց Քոֆի Անանի մշակած Սիրիայի ճգնաժամի կարգավորման ծրագիրը: Այն բաղկացած է 6 կետից և ներառում է երկու կողմից կրակը դադարեցնելու ու բանակցությունների սեղանի շուրջ նստելու պահանջներ: ՄԱԿ-ի ներկայացուցիչը նաև ուղերձով դիմել է պաշտոնական Դամասկոսին՝ պահանջելով ազատ արձակել ցույցերի ձերբակալված մասնակիցներին:
Անանի ծրագրում Ասադի հրաժարականի վերաբերյալ կետ չկա. չի բացառվում, որ Արևմուտքի կողմից պահանջվող այդ կետի բացակայությունը բացատրվում է վերջերս Մոսկվա կատարած Անանի այցով:
Հիշեցնենք, որ անցյալ հանգստյան օրերին Անանը Մոսկվայում իր ծրագիրը ներկայացրեց Ռուսաստանի իշխանություններին: Ռուսաստանն ու Չինաստանը, որոնք նախկինում արգելափակում էին ՄԱԿ-ի Անվտանգության խորհրդում Սիրիայի դեմ բանաձևերը, այս անգամ իրենց աջակցությունն են հայտնել Անանի ծրագրին:
Ըստ BBC-ի՝ ծրագրով նախատեսվում է.
1. Սիրիական հակամարտող կողմերը պետք է մշակեն երկկողմ շահերին և ժողովրդի ձգտումներին համապատասխանող որոշում:
2. Երկու կողմերը ՄԱԿ-ի վերահսկողության տակ պետք է դադարեցնեն զինված բռնության բոլոր դրսևորումները՝ քաղաքացիական բնակչության պաշտպանության համար:
3. Բանակը և ընդդիմությունը պետք է ապահովեն մարդասիրական օգնության մուտքը երկրի՝ բախումներով համակված շրջաններ և ամեն օր երկու ժամով դադարեցնեն կրակը:
4. Սիրիայի կառավարությունը պետք է հնարավորինս արագ ազատ արձակի բողոքի ցույցերին մասնակցելու համար ձերբակալվածներին:
5. Պետք է ամբողջ երկրում ապահովվի լրագրողների ազատ տեղաշարժը:
6. Իշխանությունները պետք է հարգեն հավաքների ազատությունը և խաղաղ ցույցերի իրավունքը:
Փորձագետները կարծում են, որ Անանի ծրագրի թույլ մասն այն է, որ դրանում բացակայում են պահանջների կատարման կոնկրետ ժամկետները:
