Մարտի 28-ին, Մայր Աթոռ Սուրբ Էջմիածնում, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունել է «Վորլդ Վիժն» կազմակերպության Միջին Արևելքի և Արևմտյան Եվրոպայի տարածաշրջանային ղեկավար Կոննի Լեննեբերգին և Տարածաշրջանային գործառնությունների ղեկավար Դերք Բուին:
Հանդիպմանը Ամենայն Հայոց Կաթողիկոսն իր գնահատանքն է բերել քրիստոնեական կազմակերպությանը եկեղեցիներին ցուցաբերվող զորակցության և օգտաշատ ծառայությունների համար: Վեհափառ Հայրապետն անդրադարձել է Մայր Աթոռ Սուրբ Էջմիածնի և «Վորլդ Վիժն»–ի միջև մեկ տասնամյակից ավելի պատմություն ունեցող համագործակցությանը և արձանագրված հաջողություններին: Նորին Սրբությունը մասնավոր գոհունակություն է հայտնել, որ Հայ Եկեղեցու տարբեր կառույցների և «Վորլդ Վիժն»-ի համատեղ աշխատանքները հատկապես ուղղված են մանուկների քրիստոնեական դաստիարակությանը:
«Վորլդ Վիժն»-ի ներկայացուցիչները, շնորհակալություն հայտնելով Վեհափառ Հայրապետին ընդունելության համար, ընդգծել, որ Հայոց Եկեղեցին կարևոր գործընկեր է կազմակերպության առաքելության իրականացման գործում: ՙՎորլդ Վիժն՚-ի պատասխանատուները ներկայացրեցին Հայաստան այցի իրենց դրական տպավորությունները, անդրադարձան երիտասարդների համար իրականացվող աշխատանքների կարևորությանը:
Զրույցի ընթացքում խոսվել է նաև երիտասարդության առջև ծառացած մարտահրավերների և մանուկների կրթության ու դաստիարակության խնդիրների մասին:
