«Գալա» հեռուստաընկերությանը լիցենզիայից զրկելու ՀՌԱՀ որոշումը հեռուստաընկերության ղեկավարությունը չի պատրաստվում բողոքարկել: «Գալայի» սեփականատեր Վահան Խաչատրյանի խոսքերով, Ամալյանի անլուրջ հիմնավորումներն ու որոշումները մեկնաբանելը կամ բողոքարկելը նշանակում է լեգիտիմացնել նրան և նրա «ախմախ» որոշումները. «Ամալյանը շոումեն է, և ինքը պետք է անի իր շոուն: Այն, որ «Գալա»-ի ծրագիրը անհամեմատ, բազմապատիկ անգամ ուժեղ էր, քան մյուս հեռուստաընկերությանը՝ միանշանակ է, և դրա մասին կարող է վկայել Շիրակի մարզի 220 հազար բնակչությունը: Ուստի ժամանակի անիմաստ վատնում է նրանց բացատրելը, որ սևը սև է, սպիտակն էլ` սպիտակ»:
Խաչատրյանը ասաց, որ Ամալյանին լուրջ վերաբերվել պետք չէ, քանզի նա իր ամպլուայի մեջ է:
«Գալա» հեռուստաընկերությունը մինչև 2015 թ. անալոգային ֆորմատով մնալու է եթերում, որից հետո, Խաչատրյանի ասելով, իրենք սեփական մուլտիպլեքս ձեռք բերելու հնարավորություն ունեն: «Երբ օրենքը թույլ տա, որ մասնավոր անձինք կարող են ձեռք բերել մուլտիպլեքսները, մենք այն կունենանք, և մեր հեռուստաընկերությունը եթեր կհեռարձակվի սեփական մոււլտիպլեքսով, ավելին` ես կարող եմ վարձակալությամբ տալ այն այլ ցանկացողների, որպեսզի Շիրակի մարզում հեռարձակվեն այլ հեռուստաընկերություններ ևս»,- ասաց Վահան Խաչատրյանը: