Այսօր լրագրողների հետ հանդիպմանը ԱԻՄ ղեկավար Պարույր Հայրիկյանը հայտարարեց, որ իրենք չեն մասնակցում ընտրություններին, քանի որ չեն ստացել համապատասխան աջակցություն:
«Մեր մասնակցությունը ընտրություններին կապում էինք հասարակական լուրջ աջակցության հետ: Մեր նպատակը ինչ-որ 5 տոկոս հաղթահարելը չէր, այլ կարծում էինք, որ որպես կազմակերպություն՝ այս փուլում ևս կունենանք նախկին դերակատարությունը։ Սակայն ընդամենը 400 մարդ մեզ աջակցեց, մինչդեռ առնվազն 200-ն էր անհրաժեշտ, և որոշեցինք ինքնուրույն չմասնակցել»:
Անդրադառնալով այլ կուսակցությունների հետ միավորվելու հարցին՝ Հայրիկյանը նշեց, որ շաբաթ օրը իրենց ներկայացուցչական խորհրդի ընդլայնված նիստում կքննարկեն, թե ինչ դիրքորոշում պետք է դրսևորի կուսակցությունը առաջիկա ընտրություններում:
«Կա՛մ չպետք է մասնակցենք՝ բոլորին չմասնակցելու կոչ անելով, քանի դեռ չի բացառվել նյութական արժեքների բաշխումը ընտրողներին՝ ընտրակաշառքի կամ բարեգործության տեսքով, կա՛մ պետք է աջակցենք նրանց, ում ծրագրերը մեր համար կլինեն ընդունելի»:
Հայրիկյանը հավաստիացրեց՝ կախված այն բանից, թե իրենք ում կաջակցեն կամ կընդդիմանան, ըստ այդմ էլ նրանց քվեարկողների թիվը 5-10 տոկոսով կամ կավելանա, կամ կնվազի։
Հայրիկյանը խոսեց նաև ԵԺԿ հետ իրենց համագործակցության մասին` նշելով, որ իրենք 15 տարուց ավելի աշխատում են ԵԺԿ-ի հետ: Հիմա նույն կառույցի հետ համագործակցելու հայտ են ներկայացրել 4 կուսակցություններ` ՀՀԿ, ԲՀԿ, ՕԵԿ և «Ժառանգություն», որոնք դիմել են դիտորդի կարգավիճակ ստանալու համար։ Այս կուսակցություններից ԱԻՄ-ին քիչ թե շատ հոգեհարազատ է ՀՀԿ-ն, քանի որ վերջինս ԱԻՄ-ի ծնունդն է։ Պ. Հայրիկյանը հավաստիացրեց, որ երբեք միայնակ որոշում չի կայացրել, քանզի ԱԻՄ-ը երբեք չի եղել մեկ մարդու կազմակերպություն:
Նրա խոսքերով՝ ԵԺԿ-ն վաղ թե ուշ ստիպելու է 4 կուսակցություններին միավորված հանդես գալ:
Հայրիկյանը նշեց, որ հնարավոր է՝ ԱԻՄ-ը լուծարվի. «Շաբաթ օրը քննարկվելու է նաև այդ հարցը։ Մենք ցանկանում ենք, որ Հայաստանում ստեղծվի բազմակուսակցական համակարգ և այս ընտրություններին չենք մասնակցելու։ Հնարավոր է՝ մենք զմռսենք մեր դղյակի դուռը, այսինքն՝ կուսակցությունը ոչ միայն լուծարվի, այլև դառնա անցյալի սեփականություն»։
