Այսօր հայկական ԶԼՄ-ներով տեղեկություն տարածվեց, թե գերմանական «Շպիգել» պարբերականին տված հարցազրույցում «Գազպրոմի» ղեկավար Ալեքսեյ Միլլերը հայտարարել է, որ «Գազպրոմը» Հայկական ատոմակայանի սեփականատերն է: Ի պատասխան «Առաջին լրատվական»-ի հարցման` ՀՀ էներգետիկայի նախարարության հասարակայնության հետ կապերի վարչությունից ասացին հետևյալը. «Գործող օրենսդրության համաձայն` Հայաստանի ատոմային էլեկտրակայանը հանդիսանում է Հայայաստանի Հանրապետության սեփականությունը: Ատոմակայանի բաժնետոմսերի 100%-ի սեփականատերը ՀՀ կառավարությունն է, և օրենքը թույլ չի տալիս այդ բաժնետոմսերը օտարել»: Դիտարկմանը, թե ըստ հայկական մամուլի հրապարակումների` նման հայտարարություն արել է Միլլերը, նախարարությունից պատասխանեցին, որ «Շպիգելին» Միլլերի տված հարցազրույցում (2011 թ. հունվարի 3) նման բան չի ասվել, և հայտնի չէ, թե որտեղից է Միլլերին վերագրվել այդ արտահայտությունը:
