Իրանական İRNA լրատվական գործակալության փոխանցմամբ՝ Թուրքիան պատրաստ է միջնորդի դեր ստանձնել Իրանի ու «Վեցյակի» (Ռուսաստան, ԱՄՆ, Մեծ Բրիտանիա, Չինաստան, Ֆրանսիա և Գերմանիա) միջև: Այս մասին հայտարարել է Իրանում Թուրքիայի դեսպան Ումիթ Յարդըմը:
Վերջինս հավելել է, որ Թուրքիան շահագրգռված է Իրանի ու «Վեցյակի» միջև կոնսենսուսի ձեռքբերմամբ. «Ամեն ինչ կախված է կողմերից, որոնք պետք է ցանկություն հայտնեն Անկարայի միջնորդությամբ բանակցությունների անցկացման մասին: Վարչապետ Էրդողանը Սեուլում ԱՄՆ նախագահ Բարաք Օբամայի հետ քննարկել է Իրանի միջուկային ծրագրի վերաբերյալ բանակցությունների անցկացման հարցը: Հնարավոր է, որ բանակցություններ անցկացնելու հարցում Էրդողանի ունեցած փորձը կօգնի Իրանի ղեկավարությանը՝ ընդունելու կառուցողական որոշում»:
Հիշեցնենք, որ, ոչ պաշտոնական տվյալներով, Իրանի և «Վեցյակի» միջև բանակցություններն անցկացվելու են ապրիլի 13-ին: Սակայն դեռ համաձայնեցված չէ դրանց անցկացման վայրը: Նշվում է, որ «Վեցյակը» մերժել է Թուրքիայի առաջարկած և Իրանի կողմից հավանության արժանացած ստամբուլյան տարբերակը, իսկ Իրանն իր հերթին մերժել է «Վեցյակի» առաջարկած Վիեննայի տարբերակը, քանի որ այնտեղ է գտնվում ԱԷՄԳ-ի շտաբ-բնակարանը, որը կարծում է, թե Իրանն առաջ է շարժվում միջուկային զենքի ստեղծման ուղղությամբ:
