ԵԱՀԿ Մինսկի խմբի անարդյունավետ գործունեության մասին Թուրքիայի վարչապետ Ռեջեփ Թայիփ Էրդողանի գնահատականները նոր չեն և չարժե մտավախություն ունենալ, որ այդ երկրի՝ կարգավորման մեջ ներգրավելու ցանկությունն իրականություն դառնա: «Առաջին լրատվական»-ի հետ զրույցում նման տեսակետ հայտնեց թուրքագետ Ռուբեն Սաֆրաստյանը:
«ԵԱՀԿ Մինսկի խմբի գործընթացում Թուրքիային ներգրավելու Էրդողանի ցանկությունը մոտավորապես 10 տարվա վաղեմություն ունի: Գրեթե մեկ տասնամյակ է՝ Թուրքիան ցանկություն է արտահայտում և ջանքեր գործադրում ԼՂ խնդրում միջնորդի դեր ստանձնել: Փորձելով վարկաբեկել ԵԱՀԿ Մինսկի խմբի կատարած աշխատանքը՝ Թուրքիան փորձում է մտնել գործընթացի մեջ: Սակայն ամենակարևորն այն է, որ ՄԽ աշխատանքները բավական հաջող են ընթանում, և չկա ոչ մի պատճառ, որպեսզի հակամարտող կողմերը հրաժարվեն այդ աշխատանքներից: Մյուս կարևոր հանգամանքն այն է, որ Թուրքիայի միջնորդությունը Հայաստանի կողմից չի կարող ընդունվել մի պարզ պատճառով. այդ երկիրն Ադրբեջանի ամենուժեղ պաշտպանն է և հարցին միակողմանի մոտեցում է ցուցաբերում»,- ասաց թուրքագետը:
Նշենք, որ Սեուլում կայացող Միջուկային անվտանգության երկրորդ գագաթնաժողովին Թուրքիայի վարչապետ Ռեջեփ Թայիփ Էրդողանը հայտարարել էր, որ Լեռնային Ղարաբաղի հարցում Մինսկի խմբի գործունեությունը դադարում է արդյունավետ լինել:
