Ինչպես հաղորդում է France Presse գործակալությունը, Թուլուզի դատախազությունը Մուհամմեդ Մերայի բարեկամներին թույլ է տվել նրան թաղել Ալժիրում: Այդ որոշումը Մերայի ընտանիքը ստացել էր դեռևս մարտի 23-ին, իսկ երեկ նրանք դիմել են Ալժիրի հյուպատոսություն` նման թույլտվություն ստանալու համար:
Նշվում է, որ եթե թույլտվությունը ստացվի, ապա թաղման արարողությունը կկայանա հինգշաբթի օրը:
Հիշեցնենք, որ ալժիրյան ծագումով ֆրանսիացի Մուհամմեդ Մերան 2012 թ. մարտին Ֆրանսիայի հարավում մի շարք սպանություններ իրականացրեց: Նրա ձեռքով մահացավ յոթ մարդ` հրեական քոլեջի երեք աշակերտներ, նրանց ուսուցիչը և երեք զինվորականներ:
Մարտի 21-ի գիշերը ֆրանսիական ոստիկանության հատուկ ջոկատայինները ձեռնամուխ եղան 24-ամյա ծայրահեղականին ձերբակալելու գործին: Ֆրանսիական իշխանություններն անխնա քննադատության ենթարկվեցին, երբ պարզ դարձավ, որ Մերան նախկինում հայտնվել է ոստիկանության ուշադրության կենտրոնում, բայց նրան ձերբակալելու ոչ մի հիմք չի եղել:
