Yahoo! ընկերության կողմից Facebook-ի դեմ ներկայացված արտոնագրերի խախտման հայցադիմումները կարող են լրջորեն վնասել սոցիալական ցանցի ֆինանսները: Այս մասին նշվում է Facebook-ի` ԱՄՆ բորսաների և արժեթղթերի հանձնաժողովին ներկայացրած փաստաթղթերում:
«Դատական գործընթացը դեռ գտնվում է սկզբնական փուլում, սակայն եթե դատարանը մեզ համար անցանկալի որոշում ընդունի, ապա դա կարող է նյութական վնաս հասցնել մեր բիզնեսին, ֆինանսական ցուցանիշներին»,- ասվում է Facebook-ի փաստաթղթում:
Սոցիալական ցանցի հիմնական մտահոգությունը կապված է այն հանգամանքի հետ, որ նախատեսվում է բաժնետոմսերի առաջնային տեղաբաշխում իրականացնել, որից ստացվող եկամուտը կկազմի 5-10 մլրդ դոլար:
Հիշեցնենք, որ Yahoo!-ն այս տարվա մարտի 12-ին դիմել էր դատարան` աշխարհի ամենամեծ սոցցանցին մեղադրելով մի շարք արտոնագրերի պայմանների խախտման մեջ: