«Ե՛վ տնտեսական, և՛ մշակութային որոշակի շեղումների պատճառով թատրոնը գտնվում է վատ վիճակում: Եթե մենք կարգի բերենք մեր պետականության բոլոր բաղադրիչները, այս խնդիրը ևս կլուծվի»,- այս մասին «Առաջին լրատվական»-ի հետ զրույցում ասաց դերասան Աշոտ Ադամյանը:
Ըստ նրա՝ բոլոր ոլորտները՝ տնտեսական, մշակութային, կրթական, պետք է ավելի բարձր մակարդակի հասցնել. «Բոլոր այդ ոլորտները, ցավոք, շատ անմխիթար վիճակում են»:
«Քանի որ թատրոնը խնդիրներ ունի, հետևաբար խաթարվել է նաև թատրոն-հանդիսատես կապը: Երբ մարդու ձգտումները լինեն ավելի հոգևոր, քան նյութական՝ այդ կապը կվերականգնվի: Թատրոնը հավերժ է: Մենք չէ, որ պետք է սպանենք կամ նորից ծնենք թատրոն: Պարզապես կարող ենք կա՛մ ունենալ թատրոն, կա՛մ չունենալ»,- հաստատեց դերասանը:
Վերջում Ադամյանը, շնորհավորելով թատրոնի նվիրյալներին տոնի կապակցությամբ, ասաց. «Շնորհավորում եմ և ցանկանում, որպեսզի թատրոնը նորից գրավի իր նախկին հոգևոր բարձր դիրքը»
