Սիրիայի իշխանությունները պաշտոնական պատասխան են տվել ՄԱԿ-ի և Արաբական պետությունների լիգայի հատուկ բանագնաց Քոֆի Անանի՝ հակամարտության կարգավորման ծրագրին,- հաղորդում է Reuters-ը: «Սիրիայի կառավարությունը պատասխանել է բանագնաց Ք. Անանի կոողից մշակված 6 կետից բաղկացած ծրագրին»,- հայտնել է Անանի պաշտոնական ներկայացուցիչ Ահմադ Ֆաուզին: Նրա խոսքերով՝ Անանն ուսումնասիրում է փաստաթղթի տեքստը և շուտով իր պատասխանը կներկայացնի: Այլ մանրամասներ Ֆաուզին չի հաղորդել:
Ավելի վաղ ՄԱԿ-ի Անվտանգության խորհուրդը միաձայն իր աջակցությունն էր հայտնել Սիրիայի հարցով Անանի աջաջարկած ծրագրի բոլոր կետերին: Հայտարարության տեքստը հավանություն էր ստացել ԱԽ բոլոր 15 անդամների, այդ թվում՝ Ռուսաստանի և Չինաստանի կողմից:
Երեկ Քոֆի Անանը հայտարարել է, որ Սիրիայում, որտեղ 2011 թ. մարտից շարունակվում է իշխանությունների և ընդդիմության միջև հակամարտությունը, չի կարելի դրությունը թողնել ինքնահոսի, սակայն սահմանել հակաճգնաժամային ծրագրի ժամանակավոր շրջանակները, որն ի վիճակի կլինի դադարեցնել արյունահեղությունը, առայժմ վաղաժամ է: Ընդ որում, Անանը նշել է, որ խնդրի կարգավորման համար ուշադրությունը կենտրոնացրել է կոնֆլիկտի երկու կողմերի վրա:
Անդրադառնալով դրության կայունացման ժամանակավոր շրջանակներին՝ բանագնացը նշել է, որ հակամարտող կողմերի միջև որևէ համաձայնագրի բացակայության դեպքում խոսել խաղաղ կարգավորման հնարավոր ժամկետների մասին առայժմ նպատակահարմար չէ:
Հիշեցնենք. մարտի 25-ին Անանը Մոսկվայում հանդիպել է Ռուսաստանի նախագահ Դմիտրի Մեդվեդևի հետ, որն իր լիակարտար աջակցությունն է հայտնել նրա ծրագրին: Այսօր Անանը Պեկինում կհանդիպի Չինաստանի վարչապետի հետ:
