Ինչպես հաղորդում է Cumhuriyet օրաթերթը, Թուրքիա կատարելիք այցի ժամանակ ԱՄՆ պետքարտուղար Հիլարի Քլինթոնը կհանդիպի ժողովրդադեմոկրատական կուսակցության նախագահ Քեմալ Քըլըջդարօղլուի հետ: Այս քայլով Քլինթոնը կփարատի այն մտահոգությունը, թե ընտրություններից մի քանի ամիս առաջ Թուրքիա այց կատարելը կնշանակի աջակցություն ցույց տալ իշխող «Ազատություն և զարգացում» կուսակցությանը (Թուրքիայի խորհրդարանական ընտրությունները կկայանան 2011 թ. հունիսին):
Քլինթոնի հետ հանդիպումը հաստատել է նաև Քըլըջդարօղլուն: Ընդդիմադիր կուսակցության առաջնորդը հայտարարել է, որ Քլինթոնին է փոխանցելու երեք զեկույց, որոնք վերաբերում են Թուրքիայի «դատական համակարգին, ազատ խոսքին և պետական ծախսերին»:
«Չի կարելի խոսել Թուրքիայում առողջ ժողովրդավարության մասին, երբ հասարակական ծախսերը առողջ չեն: Մենք այս զեկույցները միայն Քլինթոնին չենք տա, այլ մեզ այցելող բոլոր արտասահմանցիներին»,- ավելացրել է Քըլըջդարօղլուն։ Նա հույս ունի, թե դրա արդյունքում բոլորը կհասկանան, որ ԱԶԿ-ն ո՛չ ժողովրդավարական և ո՛չ էլ ազատություններին աջակցող կուսակցություն է: