Թեև ԵԱՀԿ Մինսկի խմբի համանախագահող երկրների արտգործնախարարների մարտի 22-ի համատեղ հայտարարության մեջ արտառոց որևէ դրույթ չկա և այն կարելի է դասել սովորական դարձած հայտարարությունների թվին, սակայն խիստ կարևոր է, որ դրանում մեկ անգամ ևս շեշտվում է ԼՂ հակամարտության խաղաղ կարգավորման անհրաժեշտության մասին: «Առաջին լրատվական»-ի հետ զրույցում ասաց ԼՂՀ նախագահի մամլո քարտուղար Դավիթ Բաբայանը:
«Խաղաղ կարգավորման դրույթն ամենաէականն ու շոշափելին է, որ կա Հիլարի Քլինթոնի, Սերգեյ Լավրովի ու Ալեն Ժյուպենի հերթական հայտարարության մեջ»,- նշեց նա:
Բաբայանի խոսքով՝ հակամարտությունն արդեն իսկ լուծված է: «Այլ բան է, որ Ադրբեջանը պետք է փոխի իր քաղաքականությունը և հանդես գա առավել կառուցողական դիրքերից»,- նկատեց ԼՂՀ նախագահի մամլո քարտուղարը:
Նշենք, որ նախօրեին իրենց համատեղ հայտարարության մեջ ԵԱՀԿ Մինսկի խմբի համանախագահող երկրների՝ ԱՄՆ-ի, Ռուսաստանի ու Ֆրանսիայի ԱԳ նախարարները նշել են. «Կոչ ենք անում հակամարտության կողմերին դրսևորել հիմնախնդրի խաղաղ կարգավորման համար անհրաժեշտ քաղաքական կամք: Նաև կոչ ենք անում կողմերին ավարտել շրջանակային համաձայնագրի և Հելսինկյան եզրափակիչ ակտի երեք սկզբունքների՝ ուժի և ուժի սպառնալիքի չկիրառման, տարածքային ամբողջականության և ազգերի ինքնորոշման իրավունքի հարգման, ՄԱԿ-ի կանոնադրության, ինչպես նաև միջազգային իրավունքի նորմերի և սկզբունքների հիման վրա մշակված՝ խնդրի վերջնական կարգավորման շուրջ աշխատանքը, ինչը թույլ կտա հանել տարածաշրջանը ստատուս-քվոյի շրջանակներից և ապահովել անվտանգ ու բարգավաճ ապագա»:
