Ռուսական Интерфакс լրատվական գործակալության փոխանցմամբ՝ Հարավային Օսիայի ընդդիմության առաջնորդ Ալլա Ջիոևան հայտարարել է, որ պատրաստ է ընդգրկվել Հարավային Օսիայի կառավարության կազմում, եթե նոր նախագահի քաղաքական կուրսը չտարբերվի իր քաղաքական հայացքներից:
Նա հավելել է, որ դեռևս գտնվում է հիվանդանոցում և չի կողմնորոշվել Հարավային Օսիայի նախագահական ընտրություններին մասնակցելու հարցում: Նա անգամ չի բացառել, որ իրեն քվեարկելու հնարավորություն չտան:
Հիշեցնենք, որ նախորդ տարվա նոյեմբերի 27-ին Հարավային Օսիայում տեղի ունեցավ նախագահական ընտրությունների երկրորդ փուլը, որում հաղթեց Ջիոևան: Սակայն Հարավային Օսիայի Գերագույն դատարանը չեղյալ հայտարարեց դրանք՝ իր որոշումը պատճառաբանելով նրանով, որ Ջիոևայի համակիրները բազմաթիվ ընտրախախտումներ են կատարել:
Նախագահական նոր ընտրությունները նշանակվեցին այս տարվա մարտի 25-ին: Ջիոևան իր անհամաձայնությունը հայտնեց դրան և փետրվարի 10-ին նշանակեց իր երդման արարողությունը: Սակայն փետրվարի 9-ի գիշերը Հարավային Օսիայի իրավապահները հայտնվեցին նրա շտաբում և տարան հարցաքննության:
Մի շարք տվյալներով, հատուկջոկատայինները գրոհով գրավել են Ջիոևայի տունը և ինքնաձիգի խզակոթով հարվածել նրա գլխին, ինչի հետևանքով նա կորցրել էր գիտակցությունը և հայտնվել հիվանդանոցի վերակենդանացման բաժնում: Փետրվարի 13-ին Ջիոևայի առողջական վիճակը բարելավվել էր, և նա այնտեղից բերվել է հիվանդասենյակ:
