«Մեծամասնական մի շարք ընտրատարածքներում հետաքրքիր պայքար է ծավալվում «Օրինաց երկիր» և «Բարգավաճ Հայաստան» կուսակցությունների միջև»,- գրում է «Ժողովուրդ»-ը և հավելում.
«Գեղարքունիքի մարզի թիվ 23 ընտրատարածքում թեև «խոսացած» է, որ պետք է ընտրվի ՕԵԿ ներկայացուցիչ Կարեն Բոթոյանը (Սերգեյ Մանուկյանի` շինանյութի Սերգեյի փեսան), այնուամենայնիվ «Բարգավաճ Հայաստան» կուսակցության ներկայացուցիչ Էդուարդ Սահակյանը լուրջ գլխացավանք է դարձել: Նրա համար ակտիվ աշխատում է Աժ պատգամավոր Հրանտ Մադաթյանը` Մոթելի Հրանտը, որին արգելվեց թեկնածություն առաջադրել այդ ընտրատարածքում:
«Ժողովուրդ»-ը տեղեկացել է, որ այս ընտրատարածքում Հանրապետական կուսակցության նախընտրական շտաբի պետ Հովիկ Աբրահամյանը 2007-ի նման «տակից» աշխատում է ԲՀԿ-ի համար: Նա Գեղարքունիքի հանրապետական փոխմարզպետ Արտյուշ Ղուկասյանին արդեն հրահանգել է` աշխատել ԲՀԿ-ի համար: Արտյուշն էլ ակտիվորեն լծվել է ԲՀԿ-ական Սահակյանի ընտրարշավին: Շինանյութի Սերգեյն էլ, ընկած դռնեդուռ, իրեն աջակիցներ է որոնում»:
