«Երկիր»-ը գրում է. «Մինչ պաշտոնական ամենաբարձր օղակներից շարունակում են հնչել առաջիկա խորհրդարանական ընտրությունների ժողովրդավարական, ազատ և արդար, աննախադեպ ու թափանցիկ լինելու մասին նորանոր խոստումներ ու հայտարարություններ, մինչ իշխող կուսակցության առաջնորդները կոռեկտ և քաղաքակիրթ ընտրապայքարի հավաստիացումներ են տալիս, իսկ վարչապետը առիթը բաց չի թողնում մեկ անգամ ևս հայտարարելու, որ իշխանությունները «խիստ կարևորում են ընտրությունների որակը», հանրությունը, հակառակ այս բոլորի, ականատես է դառնում ընտրություններում գլխավոր համարվող մրցակիցների պայքարի ամենանսեմ, գռեհիկ ու անկիրթ դրսևորումներին միայն:
Երբ իշխող կուսակցության գործադիր մարմնի անդամն իր կոալիցիոն գործընկերոջը հեգնում է «ուղեղի բացակայության» համար, իսկ վերջինս հակադարձում է նրան, թե «ամեն լերկ ու փայլող բան չէ, որ գլուխ է», երբ ի պաշտոնե սերունդ կրթող հանրապետականը մրցակցին վիրավորում է և համարում, որ նրա «վնգստոցին» չարժե ուշադրություն դարձնել, և վերջինս էլ գրեթե նույն կերպ է հակադարձում, ուրեմն անկախ Հայաստանի պատմության մեջ «երբևէ անցկացված լավագույն ընտրությունների» իշխանական խոստումները ոչ միայն չեն իրականանում, այլև որևէ մեկին հավատ էլ չեն ներշնչում, թե այս երկրում ինչ-որ բան փոխվելու է:
Հավատը` իր հերթին, այս իշխանությունները մարդկանց վերջին հույսն են սպանում, փոփոխությունների, բարեկեցիկ կյանքի և անվտանգ ապագայի հույսը:
Եթե նրանց կամքին թողնենք, ապա այդ հույսը մեռած կմնա առաջիկա առնվազն 5-6 տարիներին էլ: Արդարև մեռած, եթե նույն կերպ` «մեռած» ու անտարբեր պիտի նայենք, թե ինչպես են հանուրիս ճակատագիրը որոշում մի բուռ բախտախնդիրներն ու նորելուկ «լերկ գլուխները»»,- հավելում է թերթը:
