«Օրինաց երկիր» կուսակցության մամլո քարտուղար Սուսաննա Աբրահամյանը իր լիազորությունները վայր է դնում ՕԵԿ-ում չգնահատված լինելու պատճառով: Այս մասին նա ասաց «Առաջին լրատվական»-ի հետ զրույցում՝ միաժամանակ նշելով, որ ինքը ոչ ոքից նեղացած չէ:
«Ես կարևորում եմ ոչ թե Սուսաննա Աբրահամյան անձի, այլ ՕԵԿ մամլո խոսնակի դերը, որը ռազմավարական առումով կարևոր օղակ է: Մամուլի պատասխանատուի դերը շատ մոտ է կանգնած կուսակցության քաղաքական գիծն առաջ տանելու և նրա վարկանիշը բարձրացնելու գործին: Բացի այդ, լրատվամիջոցների հետ աշխատելը ամենաբարդ աշխատանքն է»,- նշեց Աբրահամյանը:
ՕԵԿ մամլո քարտուղարի խոսքով, իր՝ կուսակցության համամասնական ցուցակի 36-րդ տեղում լինելը վիրավորանք է ոչ թե Սուսաննա Աբրահամյան անձին, այլ նշան, որ չի կարևորվել քաղաքական ուժի մամլո խոսնակի դերը:
Նշելով, որ ինքը պատրաստվում է հեռանալ ոչ միայն մամլո խոսնակի պաշտոնից, այլ նաև ՕԵԿ-ից ընդհանրապես՝ Սուսաննա Աբրահամյանը միաժամանակ հավաստիացրեց, որ ինքը ոչ մի այլ կուսակցության երբեք չի անդամակցի: «Ես պաշտոնապես հերքում ու բացառում եմ որևէ կուսակցության երբևիցե հարելու հանգամանքը՝ նույնիսկ մեկ-երկու տարի հետո: Ես լրագրող եմ, անկախ մարմին, և հայտնի է, որ մարդը մամլո քարտուղարի գործառույթ կարող է իրականացնել՝ առանց կուսակցության անդամ լինելու»:
