Մոսկվայում Միացյալ Նահանգների դեսպան Մայքլ Մըքֆոլը հայտարարել է, որ ԱՄՆ-ը չի ֆինանսավորում Ռուսաստանի ընդդիմադիր կազմակերպությունների ու կուսակցությունների ցույցերը: Այս մասին դիվանագետը հայտնել է «Ամերիկայի ձայն» ռադիոկայանին տված հարցազրույցում:
«ԱՄՆ կողմից Ռուսաստանի քաղաքացիական հասարակության զարգացմանն ուղղված գումարներից ոչ մի մաս չի նախատեսվում ոչ քաղաքական կազմակերպությունների, կուսակցությունների ու շարժումների, ոչ ցույցեր կազմակերպելու, ոչ քաղաքական առաջնորդների համար: Եվ ես կարծում եմ, որ այստեղ՝ Ռուսաստանում, այդ հարցում խորապես սխալվում են»,- ասել է Մըքֆոլը:
Դեսպանը նաև նշել է, որ «Ռուսաստանում համաամերիկականության մակարդակը բոլորի համար իսկական անակնկալ է դարձել»: «Մենք համոզված էինք, որ միանգամայն այլ ճանապարհով ենք հարաբերություններ ստեղծում»,- ասել է նա՝ հավելելով, որ «ԱՄՆ-ն ընդհանրապես շահագրգռված չէ սառը պատերազմի նման իրավիճակի և խոցող հռետորաբանության վերադառնալու մեջ»:
ԱՄՆ դեսպանը խոսել է նաև ռուս-ամերիկյան հարաբերություններում առկա խնդիրների մասին՝ նշելով, որ գլխավոր խնդիրներից մեկը շարունակում է մնալ հակահրթիռային պաշտպանությունը: «Մենք շատ աշխատանք ունենք անելու, որպեսզի Ռուսաստանի իշխանություններին օգնենք հասկանալ, թե մեր համակարգը ինչ կարող է անել և ինչ չանել»,- ասել է նա:
