Երեկ ԱՄՆ Վերմոնտ նահանգում տեղի է ունեցել բազմամարդ բողոքի ցույց «Վերմոնտ յանկի» ատոմակայանի շահագործման ժամկետը երկարացնելու դեմ, որի ժամանակ ձերբակալվել է ավելի քան 100 մարդ:
Ինչպես հաղորդում է Fox News հեռուստաալիքը, ավելի քան 1000 մարդ շրջափակել է էլեկտրակայանի մոտ գտնվող գրասենյակի շենքը՝ իրենց դժգոհությունը հայտնելով իրենց կարծիքով՝ ոչ անվտանգ օբյեկտի հետագա շահագործման դեմ:
Այն բանից հետո, երբ ցուցարարները հրաժարվել են կատարել ոստիկանության՝ ցրվելու հրամանը, սկսվել են ձերբակալությունները: Տեղի ԶԼՄ-ների հաղորդմամբ՝ ընդհաուր առմամբ ձերբակալվել է 130 մարդ:
«Վերմոնտ յանկի» ատոմակայանը գործարկվել է 1972 թ. և սկզբնապես նախատեսվում էր շահագործել 40 տարի: 2010 թ. Վերմոնտի սենատը որոշեց շահագործման ժամկետի ավարտից հետո կոնսերվացնել ատոմակայանը, քանի որ վերջին տարիներին դրանում տեղի ունեցած մի քանի վթարները կասկածի տեղիք էին տալիս՝ կապված դրա անվտանգության հետ:
Սակայն մարտի 21-ին՝ շահագործման ժամկետի ավարտի օրը, ԱՄՆ միջուկային կարգավորման հարցերով հանձնաժողովը թույլատրեց այն շահագործել ևս 20 տարի: Վերմոնտի իշխանությունները փորձեցին դիմադրել դրան՝ դիմելով նահանգի դատարան: Քանի դեռ գործի լսումները շարունակվում են, ատոմակայանը կշարունակի գործել:
«Վերմոնտ յանկի»-ի շահագործման դեմ ցույցեր են տեղի ունեցել նաև Նյու Օռլեանում (Հարավային Կարոլինա նահանգ), որտեղ գտնվում է ատոմակայանի օպերատոր ընկերության գրասենյակը: Այստեղ ձերբակալվել է 7 ցուցարար:
