Վատիկանն այսօր հերքել է կարծիքներն այն մասին, որ Կուբայի կոմունիստական ղեկավարությունը կարող էր որպես «պրոպագանդայի գործիք» օգտագործել Հռոմի Պապ Բենեդիկտոս 16-րդի այցը երկիր՝ ասելով, որ այցելությունն իրականում պետք է օգնի կղզում ժողովրդավարության խթանմանը:
Ինչպես հաղորդում է Associated Press-ը, կարդինալ Տարցիսիո Բերտոնեն ասել է, որ ակնկալում է, որ Հռոմի Պապին շատերը կաջակցեն, քանի որ կաթոլիկ եկեղեցու ղեկավարն է, և նրա այցելությունը միայն օգտակար կլինի Կուբայի եկեղեցու համար:
Բերտոնեն La Stampa-ին տված հարցազրույցում ասել է, որ չի կարծում, թե այցելությունը կօգտագործվի կառավարության կողմից, և ավելացրել է, որ հույս ունի, թե եկեղեցին ու կառավարությունը Բենեդիկտոսին ցույց կտան այն հյուրընկալությունն ու վստահությունը, որին նա արժանի է՝ որպես կաթոլիկ եկեղեցու առաջնորդ:
