Սաուդյան Արաբիայի Էր-Ռիադ նահանգի նահանգապետ Սաթամ բին Աբդուլազիզը որոշում է կայացրել, որի համաձայն՝ երիտասարդ միայնակ սաուդացի տղամարդիկ կկարողանան այցելել առևտրի կենտրոններ: Այս մասին հայտնել է Agence Frabce-Presse-ը:
Նախկինում նման տղամարդկանց թույլ չէին տալիս մտնել առևտրի կենտրոններ, քանի որ նրանք կարող էին գայթակղել աղջիկներին և կանանց: Այս սահմանափակումը գործում էր միայն երեկոյան ժամերին և հանգստյան օրերին, երբ խանութները լիքն էին մարդկանցով:
Սակայն այս արգելքը չէր խոչընդոտում, որպեսզի տղամարդիկ հավաքվեին առևտրի կենտրոնների մուտքի մոտ: Այդ պատճառով նահանգապետը որոշում է կայացրել թույլ տալ միայնակ տղամարդկանց այցելել առևտրի կենտրոններ:
Սաուդյան Արաբիայում առկա կրոնական խիստ կարգերի պատճառով երիտասարդների համար զվարճանքները սահմանափակ են: Այդ պատճառով երիտասարդ սաուդացիների համար ժամանակակից առևտրի կենտրոնները դարձել են այն վայրը, որտեղ երիտասարդներն անց են կացնում երեկոյան ժամերը:
