ԱՄՆ միջուկային անվտանգության ազգային վարչության աշխատակիցները ամեն օր ֆիքսում են իրենց գերատեսչության համակարգչային ցանցեր ներթափանցման 10 մլն փորձ:
Այս մասին չորեքշաբթի հաղորդել է ԱՄՆ էներգետիկայի նախարարության աշխատակիցը։ Նրա կազմի մեջ է մտնում նաև միջուկային անվտանգության ազգային վարչությունը, որը պատախանատու է միջուկային մարտագլխիկների արտադրության ու պահպանության համար:
Վերջինիս խոսքով` ամեն օր կարող է լինել 1000 «հաջող կոտրում», սակայն չի մանրամասնել, թե ինչ են նշանակում իր խոսքերը:
ԱՄՆ միջուկային անվտանգության ազգային վարչության ղեկավար Թոմաս դ’Ագոստինոյի խոսքով` «նմանատիպ գործողություններով կարող են զբաղվել, օրինակ, հարևան երկրների կառավարությունները, սակայն մենք բախվում ենք նաև բավական քաջատեղյակ ոչ կառավարական սուբյեկտների հետ»: Որպես դրա օրինակ՝ նա բերել է Թեննեսի նահանգի ազգային լաբորատորիայի համակարգչից մի քանի մեգաբիթ փակ տեղեկատվության գողությունը: Դրանից հետո լաբորատորիայի աշխատակիցներին արգելվել էր օգտվել համացանցից աշխատավայրում:
Ամերիկյան անկախ փորձագետներն էլ նշում են, որ այդ փորձերի գերակշռող մեծամասնությունը կատարում են ինքնաբեռնվող ծրագրերը, որոնք «շարունակ սանրում են ինտերնետը` գտնելու համակարգիչների պաշտպանության խոցելի կողմերը»:
