«Չորս տարի՝ անօթևան». նման պաստառով կառավարության շենքի բակում են մոտ 40 կոնդեցիներ: Նրանք մտադիր են իրենց խնդիրը հասցնել կառավարության անդամներին:
Ինչպես «Առաջին լրատվական»-ի հետ զրույցում տեղեկացրեց Կոնդի բնակիչ Իռա Նազինյանը, արդեն չորս տարի է՝ Կոնդի 200 ընտանիքներ հայտնվել են փողոցում և չեն կարողանում, նախնական պայմանագրի համաձայն, ստանալ իրենց հասանելիք բնակարանները:
Ըստ բնակչի՝ նրանց պայմանագիրը կարելի է համարել նույնիսկ ուժը կորցրած. «Այս պահին մենք ցանկանում ենք ստանալ մեր բնակարանները: Դիմել ենք նախագահին, քաղաքապետին, վարչապետին և ստացել ենք ծիծաղելի պատասխաններ: Չեմ հասկանում՝ ինչպե՞ս կարելի է. մարդիկ, ովքեր ամբողջ կյանքում աշխատել են և ծառայել իրենց երկրին, այսօր նույն երկրում հայտնվել են անօթևանի կարգավիճակում»:
Կառավարության շենքի բակում հավաքվել են նաև գերակա հանրային շահ ճանաչված տարածքների նախկին սեփականատերերը, ովքեր նույնպես հայտնվել են փողոցում: Բողոքի ակցիային միացել են նաև թոշակառու օդաչուները` շարունակելով փոխհատուցում պահանջել աշխատանքային տարիների ընթացքում իրենց կորցրած առողջության համար:
«Բանակն իրականում» քաղաքացիական նախաձեռնության անդամները և բանակում խաղաղ պայմաններում մահացած զինծառայողների ծնողները կառավարության շենքից շարժվեցին դեպի նախագահական նստավայր:
Այս պահին կառավարության շենքի բակը մարդաշատ է, և ակցիան շարունակվում է:
