ԱՄՆ-ը հավատում է, որ Սիրիայի նախագահ Բաշար Ալ-Ասադը հրաժարական կտա, որը տեղի կունենա այդ երկրում ներքաղաքական երկխոսության արդյունքում: Այս մասին, ինչպես հաղորդում է Interfax-ը, հայտարարել է ԱՄՆ պետքարտուղարության պաշտոնական ներկայացուցիպ Վիկտորյա Նուլանդը:
«Անկեղծ ասած՝ մենք չէինք ցանկանա, որ Ասադը շարունակեր ղեկավարել երկիրը՝ իշխանության քաղաքական անցման ավարտից հետո»,- ընդգծել է նա:
Դիվանագետը, վկայակոչելով երկրի պետքարտուղար Հիլարի Քլինթոնի՝ մի քանի օր արտահայտած խոսքերը, ասել է. «Քլինթոնը առանձնացրել է այն, ինչ ասվում է ընդունված հայտարարության մեջ (ՄԱԿ-ի ԱԽ.- 1in.am): Մենք սպասում ենք, որ բռնության դադարեցումից հետո կսկսվի քաղաքական երկխոսություն, որը կհանգեցնի իշխանության քաղաքական փոխանցմանը»:
Նուլանդը կարծում է, որ նման ձևով «Քլինթոնն արտահայտել է ՄԱԿ-ի ԱԽ բոլոր անդամների ակնկալիքները»:
Պետդեպի ներկայացուցիչը նաև հայտնել է, որ ՄԱԿ-ի և Արաբական պետությունների լիգայի հատուկ ներկայացուցիչ Քոֆի Անանը «կենդանի դիավանագիտական աշխատանք է վարում տարբեր կողմերի (սիրիական հակամարտության.- 1in.am) հետ՝ որոշելու համար՝ ինչպես պետք է այդ ամենը տեղի ունենա»,- ասել է նա:
Պատասխանելով այն հարցին, թե որքան կարող է ձգձվել խնդրի լուծումը՝ Նուլանդն ասել է, որ «առաջնահերթ խնդիրը բռնության դադարեցումն է», մնացածը կախված է «Անանի թիմի» գործունեության հաջողություններից:
Հիշեցնենք. ավելի վաղ Քլինթոնը, մեկնաբանելով ՄԱԿ-ի ԱԽ՝ Սիրիայի հարցով հայտարարությունը, ասել էր. «Նախագահ Ասադին և նրա վարչակարգին մենք ամբողջ միջազգային հանրության հետ միասին ասում ենք. գնացեք այս ճանապարհով (ՄԱԿ-ի ԱԽ հայտարարությամբ առաջարկված.- 1in.am), ձեր վրա համապատասխան պարտավորություններ վերցրեք, այլապես դուք կբախվեք ավելի լուրջ ճնշման և մեկուսացման հետ»:
Երեկ ՄԱԿ-ի ԱԽ-ն հայտարարություն է ընդունել, որով իր աջակցությունն է հայտնել Անանի առաքելությանը:
