Հանգստյան օրերին կայացան Անգլիայի առաջնության 23-րդ տուրի հանդիպումները: 5 առաջատարներից երեքն իրենց հանդիպումներն անցկացրեցին շաբաթ օրը: «Չելսի»-ն «Սթենֆորդ Բրիջ»-ում առանց մեծ դժվարության 2:0 հաշվով պարտության մատնեց «Բլեքբըրն»-ին, գոլերի հեղինակներ դարձան Իվանովիչն ու Անելկան: Անչելոտտիի սաները կարծես թե հաղթահարում են ճգնաժամը:
«Մանչեսթր Սիթի»-ն սեփական հարկի տակ 4:3 հաշվով առավելության հասավ «Վուլվերհեփթոն»-ի նկատմամբ, դուբլի հեղինակ դարձավ Կառլոս Տևեսը: «Քաղաքաբնակներ»-ը հանդիպման 66-րդ րոպեին հաղթում էին 4:1 հաշվով, բայց փոքր ինչ թուլացրեցին զգոնությունն ու վերջին 5 րոպեններն անցան չափազանց լարված պայքարում: Այդուհանդերձ, «Վուլվերհեմփթոն»-ին չհաջողվեց խփել պատասխան 4-րդ գնդակը: Այս հաղթանակից հետո Մանչինիի սաները 1 օրով գլխավորեցին մրցաշարային աղյուսակը:
«Արսենալը հյուրընկալվելիս 3 անպատասխան գնդակ ուղարկեց «Վեսթ Հեմ»-ի դարպասը, դուբլի հեղինակ դարձավ Ռոբին վան Պերսին: Այս հանդիպումից հետո իր պաշտոնը լքեց «Վեսթ Հեմ»-ի գլխավոր մարզիչ Ավրաամ Գրանտը:
23-րդ տուրի կենտրոնական հանդիպումը կայացավ Լոնդոնի «Ուայթ Հարթ Լեյն» մարզադաշտում, որտեղ «Տոտենհեմ»-ն ընդունել էր «Մանչեսթր Յունայթեդ»-ին: Եթե առաջին խաղակեսն անցավ հավասար պայքարում, ապա երկրորդ խաղակեսում Հարի Ռեդնափի սաները որոշակի առավելություն ունեին և շատ ավելի սուր էին գրոհում, սակայն նրանց այդպես էլ չհաջողվեց հասնել արդյունքի` գրանցվեց գոլազուրկ ոչ-ոքի: Ալեքս Ֆերգյուսոնի սաները կրկին բարձրացան մրցաշարային աղյուսակի առաջին հորիզոնական, բայց այժմ ընդամենը խփած և բաց թողած գնդակների տարբերությամբ են գերազանցում երկրորդ տեղում ընթացող «Մանչեսթր Սիթի»-ին: Նշենք, որ «Յունայթեդ»-ը «Սիթի»-ից երկու հանդիպում պակաս է անցկացրել:
Մյուս հանդիպումներում գրանցվեցին հետևյալ արդյունքները. «Սթոուք»-«Բոլթոն»` 2:0, «Վեսթ Բրոմվիչ»-«Բլեքփուլ»` 3:2, «Ուիգան»-«Ֆուլհեմ»` 1:1, «Բիրմինհեմ»-«Ասթոն Վիլլա»` 1:1, «Սանդերլենդ»-«Նյուքասլ»`1:1, «Լիվերպուլ»-«Էվերտոն»` 2:2: